QPL: «Aqtóbe» qatarynan tórtinshi márte jeńiske jetti

ASTANA. KAZINFORM — Búgin fýtboldan Premer-lıga komandalary arasyndaǵy Qazaqstan chempıonaty 9-týrynyń alǵashqy oıyn kúni aıaqtaldy.

Atalǵan týrdy «Oqjetpes» (Kókshetaý) pen «Aqtóbe» ashty. Kezdesý barysynda kókshetaýlyq komanda birinshi bolyp esep ashty. Ony 14-mınýtta Tımýr Dosmaǵambetov óziniń enshisine jazdy. 

Oǵan 45-mınýtta «Aqtóbe» sapynan Oralhan Ómirtaev 45-mınýtta bir golmen jaýap berse, odan keıin Jaıro Jan 56, 65-mınýtta mergendik tanytty.

Osylaısha «Aqtóbe» qarsylasynan 3:1 esebimen basym túsip, qatarynan tórtinshi jeńisine qol jetkizdi. Nátıjesinde týrnır kestesinde birinshi orynǵa kóterildi.

Taǵy bir kezdesýde «Atyraý» men «Jetisý» (Taldyqorǵan) jasyl alańǵa shyqty.

Oıyn barysynda 51-mınýtta taldyqorǵandyq klýbtan Rýslan Bolov penaltıdi múltiksiz oryndasa, 96-mınýtta atyraýlyq klýbtan Zaza Tsıtskıshvılı tarazy basyn teńestirip ketti.
Komandalar 1:1 esebine qanaǵat bildirdi.

Erteń, 18 mamyrda «Ulytaý» (Jezqazǵan) men «Astana» oınasa, «Jeńis» (Astana) pen «Qyzyljar» (Petropavl), «Qaısar» (Qyzylorda) men «Turan» (Túrkistan), «Elimaı» (Semeı) men «Qaırat» (Almaty) komandalary sheberlik baıqasady.

Al «Tobyl» (Qostanaı) men «Ordabasy» (Shymkent) kezdesýi keıinge shegerilýi múmkin.

Shymkenttik klýb Túrkistan qalasynan Qostanaıǵa aýa raıynyń qolaısyzdyǵyna baılanysty usha almaǵan. Oǵan baılanysty Qazaqstan fýtbol kásibı lıgasy naqty sheshim keıin qabyldanatynyn jetkizdi.