QPL: «Aqtóbe» qatarynan ekinshi márte jeńiske jetti

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 15-týryndaǵy ekinshi oıyn kúni máresine jetti.

Bul kúngi sońǵy eki kezdesýdiń birinde «Aqtóbe» men «Atyraý» sheberlik baıqasty. 

Atalǵan oıynnyń komandalar úshin mańyzy zor edi. Aqtóbelik klýb keıingi bes oıynda nebári bir márte jeńiske jetip, bireýinde tússe, qalǵanynda qarsylasyna ese jiberip qoıdy. Osynyń saldarynan týrnır kestesindegi jaǵdaıyn birshama qıyndatyp aldy. 

Al «Atyraý» bıylǵy birinshilikte nebári bir kezdesýde jeńiske jetip, ekeýinde teń oınasa, qalǵanynda jeńilistiń aşy dámin tatty. Saldarynan týrnır kestesinde nebári bes upaımen on tórtinshi oryndy mise tutyp tur.

Oıyn barysynda aqtóbelik klýbtan Jaıro Jan 37, 80-mınýtta qos goldyń avtory atanyp, óz komandasyn jeńiske jeteledi.

Osylaısha «Aqtóbe» qarsylasynan 2:0 esebimen basym túsip, týrnır kestesinde 32 upaımen úshinshi orynǵa taban tiredi. Bul - aqtóbelik klýbtyń qatarynan ekinshi jeńisi.

Sondaı-aq «Elimaı» (Semeı) men «Tobyl» (Qostanaı) kezdesýi kóp gol sońýymen erekshelendi. 
Oıyn barysynda qostanaılyq klýbtan Marko Výkchevıch 13, Ahmed El-Messaýdı 45, Islam Chesnokov 70-mınýtta mergendik tanytsa, oǵan semeılik klýbtan Roman Murtazaev 59, Ivan Svırıdov 63-mınýtta eki golmen jaýap qaıyrdy.

Osylaısha «Tobyl» qarsylasynan 3:2 esebimen basym túsip, týrnır kestesindegi jaǵdaıyn jaqsarta tústi.

Atalǵan týrdaǵy ekinshi oıyn kúni, 5 shildede «Ordabasy» (Shymkent) men «Qyzyljar» (Petropavl) 0:0 esebine qanaǵat bildirse, elordalyq «Jeńis» óz alańynda jezqazǵandyq «Ulytaýdan» 2:0 esebimen basym tústi.

Eske salsaq, budan buryn 4 shildede «Qaırat» «Turandy» 4:0 esebimen jeńip, birinshi orynǵa kóterildi.

Endi 6 shildede «Jetisý» (Taldyqorǵan) men «Astana», «Oqjetpes» (Kókshetaý) men «Qaısar» (Qyzylorda) jasyl alańǵa shyǵady.