QPL: «Aqtóbe» «Ertistiń» osal tusyn tapty

ASTANA. KAZINFORM - Qazaqstan Premer-lıgasynda jetinshi týrynyń alǵashqy oıyn kúnin «Aqtóbe» - «Ertis» (Pavlodar) komandalary túıindedi.

Kezdesý barysynda aqtóbelik klýb alǵashqy mınýttan jyldam gol soǵý múmkindigin izdedi. Soǵan qaramastan birinshi kezeńde olar degenine jete alǵan joq. 

Ekinshi kezeńde 63-mınýtta aqtóbelik klýbtan Dmıtrıı Topalov áriptesi Artýr Shýshenachevke ádemi pas shyǵaryp berdi. Ony Artýr golǵa aınaldyryp, óz komandasyna jeńis syılady. 

Osylaısha «Aqtóbe» qarsylasynan 1:0 esebimen basym túsip, týrnır kestesinde 10 upaımen jetinshi orynǵa kóterildi.

Sondaı-aq búgin shymkenttik «Ordabasy» syrt alańda Petropavldyń «Qyzyljaryn» 2:1 esebimen jeńse, «Oqjetpes» (Kókshetaý) - «Qaısar» (Qyzylorda) 1:1, «Altaı» (Óskemen) - «Jeńis» (Astana) 0:0 esebine qanaǵat bildirdi.

26 sáýirde 15:00-de «Jetisý» (Taldyqorǵan) - «Ulytaý» (Jezqazǵan), 16:00-de «Tobyl» (Qostanaı) - «Kaspıı» (Aqtaý), 18:00-de «Qaırat» (Almaty) - «Elimaı» (Semeı),
20:00-de «Astana» - «Atyraý» oınaıdy.