QPL: «Aqtóbe» bıylǵy birinshilikti iri jeńispen bastady

ASTANA. KAZINFORM — «Aqtóbe» fýtboldan Qazaqstan Premer-lıgasy 2026 jylǵy maýsymyn iri jeńispen bastady.

Aqtóbelik komanda birinshi týrda qostanaılyq «Tobyl» komandasymen sheberlik baıqasty.
Eki komanda bıylǵy birinshilikte joǵary orynnan kórinýdi qalaıdy. Sondyqtan jankúıerler olardan qyzyqty oıyn kútti.

Aqtóbelik klýb alǵashqy mınýttan shabýylǵa kóńil bóldi. Oıynnyń 24-mınýtynda aqtóbelik klýbtan Danıel Sosa esep ashsa, 46-mınýtta Aıdın Zelkovıch basymdyqty arttyrdy.

Al Tımýr Dosmaǵambetov 68-mınýtta mergendik tanytsa, oǵan 72-mınýtta qostanaılyq klýbtan Jaslan Jumashev bir golmen jaýap qaıyrdy.

«Aqtóbe» sapynan Ivan Ordets 74-mınýtta birinshiliktegi birinshi golyn soqty.
Osylaısha olar qarsylasynan 4:1 esebimen basym tústi.

Bul oıynda aqtóbelik klýb sapynda belgili fýtbolshy Nanı alǵashqy kezdesýin ótkizdi.

Sondaı-aq birinshi týrda «Oqjetpes» (Kókshetaý) pen «Elimaı» (Semeı) 1:1 esebimen teń tússe, almatylyq «Qaırat» syrt alańda óskemendik «Altaıdy» 1:0 esebimen jeńdi. 

Endi búgin «Ordabasy» (Shymkent) men «Ertis» (Pavlodar) oınasa, 8 naýryzda «Qyzyljar» (Petropavl) men «Kaspıı» (Aqtaý), «Atyraý» men «Ulytaý» (Jezqazǵan), «Qaısar» (Qyzylorda) men «Jeńis» (Astana), «Astana» men «Jetisý» (Taldyqorǵan) kezdesedi.