QPL: 9 gol soǵylǵan oıynda «Turan» elordalyq komandaǵa ese jiberdi

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń HHІV-týryndaǵy taǵy bir oıynnyń nátıjesi belgili boldy.

Bul týrdaǵy ekinshi kezdesýde «Jeńis» (Astana) pen «Turan» (Túrkistan) komandalary sheberlik baıqasty.

Bıylǵy dop dodasyn eki komanda da sátsiz bastaǵan edi. Dese de elordalyq klýb odan keıin jaqsy oıyn órnegin kórsetip, birneshe týr boıy jeńilistiń aşy dámin tatqan joq. Nátıjesinde týrnır kestesindegi jaǵdaıyn jaqsartyp, birinshi lıgaǵa túsip qalý qaýpinen birjola qutyldy. 
Esesine «Turannyń» jaǵdaıy máz emes. Alǵashqy týrlarda táp-táýir nátıjege qol jetkizgen edi. Sodan keıin sátsizdik serııasy kóz ashpaǵan ujym týrnır kestesinde tómengi jaǵyna syrǵyp ketti.

Tipti, búgin Jezqazǵannyń «Ulytaýyn» syrt alańda 5:1 esebimen tize búktirgen «Atyraý» olardy sońǵy orynǵa túsirdi.

Kezdesý barysynda astanalyq klýb birinshi kezeńde bes gol soǵyp ketti. Aldymen Dinmuhamed Qaraman 6-mınýtta esep ashsa, ol 16-mınýtta taǵy bir márte mergendigimen kózge tústi. Odan keıin Vsevolod Sadovskıı 20, 27, Jıan Martıns 42-mınýtta basymdyqty arttyrdy. Oǵan «Turan» sapynan Nıkolaı Solodovnıkov 24, ıÝrıı Pertsýh 44, Roman Chırkov 45-mınýtta úsh golmen jaýap qaıyrdy. 

Osylaısha komandalar birinshi kezeńde segiz gol soǵyp úlgerse, ekinshi kezeńde elordalyq klýbtan Zýrab Tevzadze soqqan gol oıynnyń núktesin qoıdy. 

Nátıjesinde qarsylasyna 3:6 esebimen ese jibergen túrkistandyq klýb týrnır kestesindegi jaǵdaıyn qıyndatyp aldy. Olar qazir eń sońǵy 14-oryndy mise tutyp, birinshi lıgaǵa túsip qalý qaýpi týyndap otyr. 

Endi atalǵan týrda búgin «Aqtóbe» men «Qyzyljar» (Petropavl) jasyl alańǵa shyǵady.

Al 28 qyrkúıekte «Oqjetpes» (Kókshetaý) pen «Astana», «Elimaı» (Semeı) men «Ordabasy» (Shymkent), «Tobyl» (Qostanaı) men «Qaısar» (Qyzylorda) sheberlik baıqasady.

Sondaı-aq 5 qazanda «Qaırat» (Almaty) pen «Jetisý» (Taldyqorǵan) oınaıdy.