QPL-2024: «Jeńis» alǵashqy jeńisine qol jetkizdi

ASTANA. KAZINFORM - Fýtboldan Qazaqstan Premer-lıgasynyń ekinshi týrynda elordalyq «Jeńis» Qaraǵandynyń «Shahterin» jeńip ketti.

Elordalyq komanda uzaq jylǵy úzilisten keıin Premer-lıgaǵa qaıta oraldy. Komanda quramyna birqatar fýtbolshyny shaqyrtyp, dop dodasyna daıyndyqty pysyqtady.

Esesine qaraǵandylyq klýb bıyl jergilikti fýtbolshylarǵa ıek artyp otyr. Qarjylyq máselege baılanysty olardyń qatarynan birqatar oıynshy basqa ujymǵa aýysyp ketti.

Búgingi kezdesý taǵdyryn jalǵyz gol sheshti. Ony oıynnyń 45-mınýtynda «Jeńis» sapynan Manaı Arb óziniń enshisine jazdy.

Osylaısha elordalyq klýb qarsylasynan 1:0 esebimen basym túsip, birinshiliktegi alǵashqy jeńisine qol jetkizdi.

Endi aldaǵy oıynyn «Jeńis» 31 naýryzda «Aqtóbege» qarsy ótkizse, 30 naýryzda «Shahter» «Turanmen» kezdesedi. Endi búgin, 7 naýryzda «Turan» (Túrkistan) men «Qaırat» (Almaty) sheberlik baıqasady.

Aıta ketsek, 6 naýryzda óz alańynda Qyzylordanyń «Qaısary» Petropavldyń «Qyzyljaryna» 0:3 esebimen ese jiberse, «Atyraý» men «Ordabasy» 1:1 esebine qanaǵat bildirdi.

Al qostanaılyq «Tobyl» óz alańynda «Elimaıdan» 4:2 esebimen basym tústi. Sondaı-aq 5 naýryzda «Astana» komandasy «Jetisýdi» 2:0 esebimen jeńgen edi.