QPL-2018: Úshinshi aınalym oıyndary bastaldy
QYZYLORDA. QazAqparat - Osy aptanyń demalys kúnderinde fýtboldan Qazaqstan Premer-lıgasynda úshinshi aınalym bastaldy. Elimizdiń tórt qalasynda komandalar ózara sheberlik baıqasty, dep habarlaıdy QazAqparat tilshisi.
Búgingi oıynnyń biri Qyzylorda qalasynda ótti. Jergilikti «Qaısar» Shymkenttiń «Ordabasy» klýbyn qabyldady. Árbir kezeńde bir-bir goldan soqqan «Qaısar» shabýylshysy Branıslav Pýnoshevats osylaısha qos goldyń avtory atandy. Al oǵan «Ordabasy» sapynan Nemanıa Koıch 83-mınýtta jalǵyz golmen jaýap qaıyrdy. Esep 2:1.
«Qaısar» bıylǵy birinshiliktegi 6-shy jeńisine qol jetkizdi. Osylaısha olar týrnır kestesinde jetinshi orynǵa kóterildi. Búgingi taǵy bir kezdesý Taldyqorǵanda jergilikti «Jetisý» men Pavlodardyń «Ertis» komandasy arasynda boldy. Bul kezdesýde alań ıeleri sapynan 16-mınýtta Mantas Kýklıs pen 36-mınýtta Oleg Hromtsov gol soǵyp, olar 2:0 esebimen jeńiske jetti. «Ertis» burynǵysynsha eń sońǵy orynda tursa, «Jetisý» altynshy orynǵa taban tiredi.
Osy týrdaǵy taǵy eki oıyn keshe, 18 tamyzda ótkizildi. Atyraýda qalamen attas komanda «Tobyldy» qabyldady. Atyraýlyqtar qatarynan Marat Haırýllın 51-mınýtta, ıÝre Obshıvach 85-mınýtta gol soqsa, «Tobyl» quramynan Marat Bystrov 75-mınýtta bir goldyń avtory atandy. Qatarynan úsh jeńisten keıin «Atyraý» segizinshi orynda tursa, «Tobyl» burynǵysynsha úshinshi ornyn saqtap qaldy. Al Oraldaǵy «Aqjaıyq» pen «Aqtóbe» arasyndaǵy kezdesýde 0:0 esebi tirkeldi. «Aqtóbe» besinshi, «Aqjaıyq» segizinshi orynda keledi.
Atalmysh týrdaǵy «Shahter» men «Astana», «Qyzyljar» men «Qaırat» komandalary arasyndaǵy kezdesý 31 qazanǵa shegerildi. Týrnır kestesinde baıaǵysynsha «Astana» 54 upaımen kósh bastasa, odan nebári úsh upaıy kem «Qaırat» ekinshi orynda tur. Kelesi týr oıyndary 25 jáne 26 tamyz kúnderi ótkiziledi. 25 tamyzda «Tobyl» men «Qaısar», «Ordabasy» men «Aqjaıyq», «Ertis» pen «Shahter», «Aqtóbe» men «Jetisý» komandalary kezdesse, 26 tamyzda «Qaırat» pen «Atyraý», «Astana» men «Qyzyljar» komandalary sheberlik baıqasady.
