KPI zaýyty jańa jumys oryndaryn ashyp, otandyq ónerkásipti damytýda
ASTANA. KAZINFORM - Otandyq gazohımııa salasynyń kóshbasshysy «Kazakhstan Petrochemical Industries Inc.» (KPI) kásiporny polıpropılen óndirisin ulǵaıtyp, jergilikti turǵyndar úshin jańa jumys oryndaryn ashýda. Búgingi tańda zaýytta 630 adam eńbek etýde, olardyń 80%-dan astamy – jergilikti turǵyndar.
«Biz tek óndiristi damytyp qana qoımaı, jergilikti mamandardy daıarlaýǵa da basa nazar aýdaramyz. Qazaqstandyq joǵary oqý oryndarymen tyǵyz baılanysta jumys istep kelemiz», – deıdi kásiporyn ókilderi.
Kompanııa qyzmetiniń tıimdiligin sandar da rastap otyr. Sońǵy eki jylda Qazaqstanǵa polıpropılen ımporty 63%-dan 17%-ǵa deıin tómendegen. 2025 jyldyń basynda kásiporyn taǵy bir mańyzdy qadam jasap, polıpropılenniń eki jańa markasyn shyǵara bastady.
Otandyq óńdeýshilerge qoldaý kórsetý maqsatynda KPI Almaty men Astanada iri qoımalar ashty. Qazirgi tańda «Forsajı» baǵdarlamasy aıasynda eldegi 80 polımer óńdeýshiniń 70-i kompanııamen seriktestik ornatqan.
2022 jyly iske qosylǵan KPI gazohımııa kesheni – «QazMunaıGaz» UK AQ men reseılik SIBÝR kompanııasynyń birlesken jobasy. Salynǵan ınvestıtsııalar men ozyq tehnologııalar kásiporynǵa óndiristi turaqty damytýǵa múmkindik berip, el ekonomıkasyn nyǵaıtýǵa óz septigin tıgizýde.
