Kóziniń túsin ózgertpek bolǵan áıel kórý qabiletinen aıyrylýǵa shaq qaldy
ASTANA.KAZINFORM — Almaty qalasynyń turǵyny kóziniń túsin ózgertý úshin shetelge barǵan. Alaıda operatsııadan keıin glaýkoma men móldir qabyqtyń buldyraýy sııaqty aýyr asqynýlarǵa tap bolǵan. Bul týraly Densaýlyq saqtaý mınıstrligi málim etti.
Asqynýdan keıin áıeldiń kórý qabileti kúrt nasharlaǵan: bir kózi múldem kórmeı qalǵan, al ekinshi kózimen tek jaryqty ǵana ajyrata alǵan. Sonyń nátıjesinde oǵan I toptaǵy múgedektik belgilendi.
Kómek izdegen áıel Qazaqstandaǵy jáne sheteldegi birneshe klınıkaǵa júgingenimen, eshbir maman onyń kórý qabiletin qalpyna keltirýge táýekel etpegen. Jalǵyz úmit — azdap bolsa da jaryqty sezetin kózi edi.
Kúrdeli jaǵdaıdy Almaty qalalyq ortalyq klınıkalyq aýrýhanasynyń oftalmolog dárigeri Gúlzat Ábdiraıymova óz moınyna aldy.
— Gúlzat Ábdiraıymovanyń kúrdeli operatsııalardy jasaıtynyn estigen soń, dál osy dárigerge júginýdi jón kórdim. Maǵan qaıtadan jaryq dúnıeni kórýge múmkindik bergen kásibı biliktiligi úshin dárigerlerimizge zor alǵysymdy bildiremin, — dedi patsıent.
Dárigerlerdiń aıtýynsha, jaǵdaıdy kózishilik qysymnyń óte joǵary bolýy qıyndata túsken. Operatsııa barysynda ekspýlsıvti qan ketý qaýpi joǵary bolyp, bul kórý qabiletiniń tolyqtaı joǵalýyna ákelýi múmkin edi.
Soǵan qaramastan mamandar jaryqty sezý qabileti saqtalǵan kózdi aman alyp qalýǵa sheshim qabyldady. Eki saǵatqa jýyq ýaqytqa sozylǵan kúrdeli aralas operatsııa barysynda kózishilik qysymdy tómendetýge baǵyttalǵan antıglaýkomalyq operatsııa jáne móldir qabyqty transplantattaý júrgizildi.
— Dárigerlerdiń joǵary kásibı biliktiliginiń arqasynda kózishilik qysym tómendetilip, operatsııaǵa deıin tek jaryqty ǵana ajyratqan kózdiń kórý qyzmeti qalpyna keltirildi. Hırýrgııalyq emnen keıin patsıent qaıtadan kóre bastady. Qazirgi ýaqytta ol dárigerlerdiń turaqty baqylaýynda bolyp, ońaltý kýrsynan ótip jatyr, — delingen habarlamada.
Móldir qabyqty transplantattaý — oftalmologııadaǵy eń kúrdeli operatsııalardyń biri. Almaty qalalyq ortalyq klınıkalyq aýrýhanasynda mundaı joǵary tehnologııalyq operatsııalar donorlyq baǵdarlama sheńberinde júrgiziledi. Jyl basynan beri mamandar 12 móldir qabyqty transplantattaý jasap, kóptegen patsıentke kórý qabiletin saqtap qalýǵa jáne qaıta qalpyna keltirýge múmkindik berdi.
Aıta keteıik, elimizde 53 myńnan astam mektep oqýshysynan kóz aýrýlary anyqtaldy.
