Kózine tuz septi: Ógeı ákesi sabaǵan 8 jasar uldyń anasy mán-jaıdy aıtty
TALDYQORǴAN. QazAqparat – Uryp-soqqanymen qoımaı, kózine tuz septi. Jansaqtaý bólimine túsken 8 jasar ulyn azamattyq nekedegi kúıeýi qalaı soqqanyn balanyń anasy Nına Shelıpova aıtyp berdi, dep habarlaıdy QazAqparat tilshisi.
N.Shelıpova azamattyq nekedegi kúıeýi jalǵyz ulyn ólimshe etip sabap jatqan kezde úıde bolǵan.
«Sol ýaqytta kúıeýimnen qoryqtym. Balam ekeýimizdi birdeı óltiredi dep oıladym. Ol ishimdik iship alǵan. Biz onyń aıtqanynyń bárin istedik. «Vannany jý» dedi, jýdyq. Biraq soǵan qaramastan ulymdy uryp-soqty. Kózine tuz septi», - dedi balanyń anasy.
Ógeı ákesinen soqqy jegen 8 jasar ul qazir Taldyqorǵandaǵy oblystyq Balalar aýrýhasynyń jansaqtaý bóliminde jatyr. Ol sáýirdiń 18-inen 19-yna qaraǵan túni túngi saǵat on eki jarymda jedel járdem kóligimen osy jerge jetkizilgen. Bala es-túzsiz halde bolǵan.
«Úsh kúnnen keıin ǵana esin jıdy. Mıyna qan quıylǵan. Keýde qýysy, ish qýysy, ókpe, ishekterge zaqym kelgen. Súıekteri aman, synbaǵan», - dedi Almaty oblystyq Balalar aýrýhanasynyń bas dárigeri Marat Dosqalıev.
Balanyń anasynyń aıtýynsha, birinshi kórshileri polıtsııany shaqyrǵan. Sodan keıin ǵana ol jedel-járdemge habar bergen.
«Úıimizde otbasylyq janjaldar bolyp turady», - degen áıel óziniń alkogolge áýestigi joqtyǵyn aıtady.
«Meni de ishimdik ishti dep oılaıdy. Biraq esh ýaqytta ishpegenmin, shirkeýge baramyn», - dedi ol.
Nına Shelıpovanyń sózinshe, 32 jastaǵy er adammen kóńili jarasqanyna úsh jylǵa jýyqtaǵan. Endi onyń zań aldynda jaýap berýin talap etýde.
«Ol jasaǵan qylmysyn tolyǵymen moıyndap otyr. Qazir kúdikti ýaqytsha ustaý abaqtysynda. QR QK-niń 106 baby 1-bóligi (Densaýlyqqa qasaqana aýyr zaqym keltirý) boıynsha sotqa deıin tergeý júrgizilýde», - dedi Almaty oblystyq Polıtsııa departamenti baspasóz qyzmetiniń ókili Aqbota Ázirbek.
Al sharasyz kúıdegi balany aıaýsyz uryp-soqqan er adam úsh jyldan segiz jylǵa deıin bas bostandyǵynan shektelýi nemese osy merzimge bas bostandyǵynan aıyrylýy múmkin.
8 jastaǵy er bala jansaqtaý bólimine túskenin buǵan deıin jazǵan bolatynbyz.
