Kózine shóp salǵan áıelin ańdyǵany úshin 15 jylǵa sottalýy múmkin
ASTANA. QazAqparat - 37 jastaǵy AQSh azamaty Shon Donıs óziniń jubaıy Nensıden kúdiktenip, áıeliniń júrip-turysyn ańdyp otyrý úshin smartfon qoldanǵan. Shonnyń kúdigi ras bolyp shyǵady. Nensı óziniń bastyǵymen kúıeýiniń kózine shóp salady. Endi erkek jubaıyn zańsyz ańdyǵany úshin sottalýy múmkin, dep jazady The Sun.
Shon The Sun basylymyna bergen suhbatynda jubaıynyń opasyzdyǵyna jáne ajyrasýdan keıingi sátsizdikke qatty qaıǵyratynyn jetkizgen. Onyń ózi az bolǵandaı, endi oǵan bas bostandyǵynan aıyrylý qaýpi tónip tur. «Men eki ret jazalanǵandaı sezinip jatyrmyn» depti ol.
Shon jubaıyn ańdý úshin Find My iPhone baǵdarlamasyn qoldanǵan. Sonyń nátıjesinde ol Nensıdiń opasyzdyǵy dáleldengen 2 qysqa vıdeo túsirip alǵan. Onyń jubaıy ajyrasýǵa ótinish berip, bıyl aqpan aıynda altyjyldyq neke buzylǵan. Keıin anyqtalǵandaı, Nensı tek ajyrasýmen shektelip qana qoımaǵan.
20 shilde kúni Shon Donıs sottan qaǵaz alǵan. Ol zańsyz túrde ańdyp, bireýdiń jeke ómirine qol suqqany úshin aıyptalyp otyr. Aldanǵan kúıeýdiń soty 20 qyrkúıek kúni ótedi, amerıkalyq azamat 15 jylǵa bas bostandyǵynan aıyrylýy múmkin.
Alaıda, onyń advokaty Govard Grınberg Shonnyń tolyqtaı aqtalatynyna senimdi.
