«Kózime eriksiz jas keldi»: «Qazaqmys» ujymy Respýblıka kúnine oraı qazaqstandyqtarǵa erekshe quttyqtaý arnady

25 qazanda elimizde sońǵy 13 jylda alǵash ret Respýblıka kúni atap ótilip jatyr. 2009 jyldan beri ulttyq mereke retinde toılanbaǵan bul kúnge bıyl Prezıdent bastamasymen burynǵy mártebesi qaıtaryldy. Barlyq ulttyq merekeni asqan uıymshyldyqpen atap ótýdi dástúrge aınaldyrǵan «Qazaqmys» korporatsııasynyń ujymy qazaqstandyqtarǵa ataýly kúnge baılanysty úsh túrli quttyqtaý beınebaıanyn daıyndady.

Alǵashqy quttyqtaý beınebaıanynda «Qazaqmys» korporatsııasy «Eńbek» kásipodaǵynyń qyzmetkerleri Respýblıka kúnine oraı Eskendir Hasanǵalıevtiń «Atameken» patrıottyq ánin oryndady. Quttyqtaýdy Facebook jelisinde jarııalaǵan korporatsııa qyzmetkeri Nurbolat Bazarbekuly ujym atynan mynadaı óleń joldaryn jazǵan:

Jarqyrap janǵan kúndeı azattyǵy,

Kóriner ultymnyń da ǵajaptyǵy.

Respýblıka kúnimen quttyqtaımyn,

Óıtkeni ol - Ult kúni, Qazaq kúni!

Quttyqtaýdy jyly qabyldaǵan jeli qoldanýshylary jazba astynda aq tilegin jaýdyrdy.

«Ulylar mekeni - Ulytaý! Damı berińizder», «Qutty bolsyn, elimiz jarqyraı bersin», «Qazaq elim aman bolsyn», - dep jazǵan pikir qaldyrýshylar.

«Atameken» ánine taǵy bir quttyqtaý beınebaıany Astana, Almaty qalalary men Aqmola, Atyraý jáne Qaraǵandy oblystarynda túsirildi. Oǵan 700-den astam qazaqstandyq atsalysty. Bul aýqymdy bastamadan «Qazaqmys» ujymy da qalys qalmady.

Patrıottyq ándi «Embimunaınaz» kásipornynyń munaıshylary, T.Kúzembaev atyndaǵy shahta kenshileri, Ulttyq qaýipsizdik komıteti Shekara qyzmetiniń sarbazdary, Ulttyq ulan áskerıleri, Almaty halyqaralyq áýejaıynyń qyzmetkerleri, Qaraǵandy mashına jasaý zaýytynyń kólik qurastyrýshylary, temirjolshylar, «Rodına» agrofırmasynyń mamandary, tiginshiler jáne Astana qalasyndaǵy Nazarbaev zııatkerlik mektebiniń oqýshylary men óner, sport mektebiniń tárbıelenýshileri qazaqstandyq ánshilermen birge oryndaǵan.

Qazaqstan TV YouTube paraqshasynda jarııalanǵan vıdeo bir kúnniń ishinde 15 000-ǵa jýyq qaralym jınap úlgergen. Beınebaıandy tamashalaǵan jurtshylyq kóptegen jaǵymdy pikir qaldyryp, ándi oryndaǵandarǵa alǵys bildirgen.

«Kózime eriksiz jas keldi, qýanyshtan jylap aldym. Elimiz, táýelsizdigimiz máńgi bolsyn», «Keremet shyǵypty, osyndaı elde qazaq bolyp kelgenimizge Allaǵa sansyz maqtaýlar bolsyn», «Keremet klıp, azamatsyńdar. Elimiz aman, jurtymyz tynysh bolsyn», - dep jazǵan YouTube qoldanýshylary.

Korporatsııanyń uıymshyl qyzmetkerleri qazaqstandyqtarǵa mereke kúni tek ánnen ǵana shashý shashpaı, poezııa arqyly da quttyqtaý arnaýdy uıǵarǵan.

Úshinshi quttyqtaý beınebaıanynda «Qazaqmys» ujymy aqıyq aqyn Muqaǵalı Maqataevtyń «Úsh baqytym» óleńin oqyp, Otanǵa degen patrıottyq seziminiń asqaq ekenin taǵy bir ańdatady.

Aıta ketsek, Aqordada Respýblıka kúnine oraı ótken saltanatty jıynda prezıdent Qasym-Jomart Toqaev eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi, belsendi qoǵamdyq qyzmeti úshin bir top azamatqa memlekettik nagradalar tabystady. Olardyń qatarynda «Qazaqmys» kompanııalar Toby kásiporyndarynyń ardagerleri de bar.