Qozybaev ýnıversıtetiniń alǵashqy stýdentteri Arızonaǵa attandy
ASTANA. KAZINFORM — Búginde elimizdiń barlyq joǵary bilim berý júıesi úshin mańyzdy qadam: Qozybaev ýnıversıteti AQSh-tyń Týson qalasyndaǵy Arızona ýnıversıtetiniń negizgi kampýsyna qos dıplom baǵdarlamalary boıynsha bilim alatyn alǵashqy 29 stýdentin oqýǵa shyǵaryp saldy.
Memleket basshysynyń tapsyrmasy boıynsha elimizde alǵashqy bolyp Petropavlda Amerıkanyń jetekshi joǵary oqý orny — Arızona ýnıversıtetimen strategııalyq áriptestik bastaldy. Keıin jobaǵa elimizdiń ár óńirinen kelgen talapkerler tartyldy. Búgingi tańda Bıotehnologııa, Aqparattyq júıeler jáne ınklıýzııa baǵyttary boıynsha qos dıplom baǵdarlamalarynda tek Qazaqstannan ǵana emes, AQSh pen Reseıden de 1000-nan astam stýdent bilim alady. Qazaqstandyq stýdentter grant negizinde oqıdy, sonyń ishinde AQSh-ta turý, oqý semestrine arnalǵan shyǵyndar da kiredi. Sondaı-aq olar úshin vızalyq, saqtandyrý jáne kólik (ushý) shyǵyndary tegin qarastyrylǵan.
Mundaı yntymaqtastyq daryndy jastar shekarasyz ǵylym, halyqaralyq deńgeıdegi dıplomdar jáne jahandyq zertteýlerge qol jetkizý syndy úlken múmkindikter esigin ashady.
— Bıyl Arızona ýnıversıtetimen 152 úmitkerdi qos dıplomdy baǵdarlamaǵa qabyldandy. Aǵymdaǵy jyldyń sáýir aıynda QR Ǵylym jáne joǵary bilim mınıstri Saıasat Nurbek bastaǵan úlken delegatsııa Arızona ýnıversıtetiniń bas kampýsyna arnaıy baryp, sonyń ishinde stýdentterdi Týson qalasyna ornalastyrýǵa, olardyń oqý úderisine baılanysty barlyq máselelerdi talqylady. Sáıkesinshe ýnıversıtet osy oqý jyly ishinde olardyń Qazaqstannyń jetekshi kompanııalarynda jumysqa ornalasýy úshin kúsh biriktiredi, — dedi Qozybaev ýnıversıtetiniń Basqarma Tóraǵasy — Rektory Erbol Isaqaev.
Kelesi jyly stýdentter otanyna oralyp, eki dıplom alady. Bul olardyń jeke mansabyn qurýdaǵy múmkindikterin edáýir keńeıtedi.
Qozybaev ýnıversıtetiniń Arızona ýnıversıtetimen yntymaqtastyq jobasyna Qazaqstan Respýblıkasynyń Ǵylym jáne joǵary bilim mınıstrligi, sondaı-aq jergilikti atqarýshy organdar jan-jaqty qoldaý kórsetti. Qazirgi tańda oqý-zerthanalyq korpýs, eki jańa jataqhana ashyldy, materıaldyq-tehnıkalyq baza únemi tolyqtyrylyp otyrady, ǵylymı baılanystar keńeıdi.
Munyń bári Qozybaev ýnıversıtetin soltústik óńirdiń naǵyz akademııalyq habyna aınaldyrady. Munda álemniń 16 elinen kelgen stýdentter bilim alady. Jyl saıyn stýdentter qatary artyp keledi. Osylaı Petropavl jastardyń múmkindikteri men perspektıvalaryn júzege asyrý ortalyǵyna aınalady.
Eske sala keteıik, buǵan deıin Túrkııanyń 100 stýdenti Arızona dıplomyn Qazaqstanda alatynyn jazǵan edik.