Kózi nashar kóretin qaraǵandylyq dombyrashy bala halyqaralyq festıvalde bas júlde aldy
Baıqaýǵa Qazaqstan, Reseı, Grýzııa jáne Ózbekstannan kelgen 10 jastan 18 jasqa deıingi 3 myńǵa jýyq bala qatysty.
Fınalǵa 379 bala shyqty. 14 jasar qaraǵandylyq Nurdáýlet Saǵatbek festıvaldiń jalǵyz Gran-prı ıegeri atandy.
Mýzykant Dına Nurpeıisovanyń «Bulbul» kúıin oryndady. Ol Qaraǵandy oblysynyń bilim basqarmasynyń kórý qabileti buzylǵan balalarǵa arnalǵan №1 arnaıy mektep-ınternatynda oqıdy. Jetekshisi – Nurdáýlet Ydyrysov.
«Bala kezimnen mýzykamen áýestenemin. Biraq dombyraǵa 11 jasymda jazyldym. Úsh jyl ishinde 13 kúı jáne bir án jazdym, ony ata-anama arnadym. Ánniń sózin Órken Muńaıtpas jazǵan. Festıval kezinde qatty ýaıymdamadym, óıtkeni ózime senimdi boldym jáne jeńiske jetetinimdi sezdim. Bolashaqta kompozıtor, kúıshi bolǵym keledi, mýzyka jazǵym keledi. Dombyradan basqa, vokalmen de aınalysamyn jáne fortepıanoda oınaımyn», – deıdi Nurdáýlet.
Bul - jas mýzykanttyń qorjynyndaǵy jalǵyz jeńis emes. Ol respýblıkalyq jáne oblystyq baıqaýlarda birneshe ret bıikten kóringen.
Nurdáýletten basqa festıvalge Qaraǵandynyń basqa da jas talanttary qatysty. Olar da jaqsy nátıje kórsetti:
- «Qımylmen án salýda» joǵary toptar arasynda «№3 arnaıy mektep-ınternaty» KMM oqýshylary Alına Bakına men Ilıa Chıchýlınniń dýeti 2-oryndy ıelendi. Jetekshisi – Elena Lıtvıshkova
- «Aspaptyq oryndaýda» joǵary toptar arasynda «Kórý qabileti buzylǵan balalarǵa arnalǵan №1 arnaıy mektep-ınternaty» KMM tárbıelenýshisi Nurshat Baetova «Qarlyǵash» halyq ánin oryndap, 2-oryn aldy. Jetekshisi – Nurdáýlet Ydyrysov
- «Horeografııada» joǵary toptar arasynda «№9 arnaıy mektep-ınternaty» KMM oqýshysy Gúlnar Nurmaǵanbetova úndi bıin oryndap, 3-oryndy ıelendi. Jetekshisi – Ásel Jaǵyparova.
