Kózi nashar kóretin qaraǵandylyq Almatyǵa velosıpedpen attandy
ASTANA. QazAqparat - Kórý múmkindigi bar bolǵany 8% quraıtyn Qaraǵandy qalasynyń turǵyny velosıpedpen Almatyǵa saıahattap ketti, dep habarlaıdy Qaraǵandy oblysy ákimdiginiń saıty.
Óziniń áreketimen ol múmkindigi shekteýli azamattarǵa rýh berip, barlyq shekteýler tek olardyń sanasynda ǵana bolatynyn dáleldemek.
Damır Kárimov óziniń qoǵamdyq jumystarymen belgili: ol qorshaǵan ortany qorǵaýdy qoldaıtyn túrli aktsııalarǵa belsene qatysady, Qaraǵandydaǵy «PosadiDerevo.kz» qoǵamdyq qozǵalysyna jetekshilik etedi.
Sonymen qatar ol oblys ortalyǵyndaǵy velosıpedpen qysy-jazy júretin az ǵana adamdardyń biri.
«Men týǵanymnan tek 8 paıyz ǵana kóremin, - deıdi Damır - Álemdi basqasha kórýdiń ne ekenin bilmeımin. Men aınalamda jón taba alamyn, kez kelgen adam sekildi óz jumystarymmen aınalysamyn. Kezinde matematıka pániniń muǵalimi maǵan: «Álem basqalaryna qandaı talap qoısa, saǵan da sondaı talap qoıady. Sondyqtan sen óz ózińe joǵary talap qoıýyń kerek» degen edi. Qazir sol ustazymnyń aıtqanyn is júzine asyryp kelemin dep oılaımyn».
Búgin 6 maýsym, tańǵy 7:00-de Damır jalǵyz ózi velosıpedke otyryp, Qaraǵandydan Almatyǵa attandy. Onyń esepteýinshe, ol 5-6 kún jol júrýi tıis. Ol shatyrda túneýdi josparlaýda. Ózimen birge velosıpedti jóndeıtin saımandaryn, qaptósek, bal, jańǵaqtardan jáne keptirilgen jemisterden quralǵan taǵamdar ala ketken.
«Tamaq pen sýdy joldan ala salamyn, onda turǵan esh qıyndyq joq dep oılaımyn», - dep josparlarymen bólisiti ol.
«Meniń alys qashyqtyqqa velosıpedpen saıahattaǵan dostarym jolda júrgizýshiler toqtap, sý men tamaq beretinin aıtty. Alaıda kólikpen jetkizip salýdy usynsa, bas tartamyn. Men barlyq jolymty tek velosıpedpen baǵyndyrýdy maqsat etemin», - deıdi.
Damır úshin bul alǵashqy alys saıahat. Osyǵan deıin ol 120 shaqyrym qashyqtyqqa jolǵa shyǵyp kórgen. Almatydan saıahatshy poıyzben oralýdy josparlaýda.
