Qojaıyndaryn aqsha úshin óltirgender 19 jylǵa sottaldy
ShYMKENT. QazAqparat - Ońtústikte taǵy bir kásipker óz jumysshylarynyń qolynan qaza tapty. Bul joly sharýa qojalyǵynyń eńbekkerleri qojaıynyn baltamen shaýyp, mert qylǵan.
Tóle bı aýdanyndaǵy jan túrshigerlik oqıǵaǵa qatysty iske sot núkte qoıdy, dep habarlaıdy otyrar.kz.
Aıyptalýshylardyń biri Tobaǵabyl Shernııazov qojalyqta mehanızator qyzmetinde eńbek etken. Qylmysynan keıin bir jyl boly izdeýde júrdi. Sóz baılasqan sybaılasy Vıktor Sýrovıatkın kisi óliminen soń birden qolǵa túsip, temir torǵa jabylǵan. Tekserý barysynda sharýa qojalyǵynyń basshysy osy eki jumysshysyna ústel jaıyp, alkogol ishimdik usynǵany anyqtaldy. Onyń qaltasyndaǵy qomaqty qarjysyn baıqap qalǵan ekeý kásipkerdiń kózin joıýdy oılastyrady.
Qylmyskerler qojaıynnyń qaltasyndaǵy 2 mln teńgesin qaǵyp alyp, sý jańa kóligin ala qashqan. Biraq jolda janarmaı taýsylǵasyn, ony sol orynda qaldyrýǵa týra kelgen. Ertesine Sýhovıatkın birden isin moıyndap, polıtsııaǵa óz erkimen berilse, Shernııazov oqıǵa ornynan izin sýytqan.
Kúdiktilerge taǵaıyndalǵan jaza - 19 jyl. Biraq áli zańdy kúshine engen joq.
