Qojanazarov partııalasy Rýslan Berdenovtiń oqqa ushýyna baılanysty pikir bildirdi

ASTANA. KAZINFORM — Májilis depýtaty Aıdarbek Qojanazarov partııalasy, Shymkent qalasy ákiminiń orynbasary Rýslan Berdenovtiń oqqa ushýyna baılanysty pikir bildirdi.

— Qarý qoldanyp oq atý - árıne qastandyq. Iá, qol astynda jumys istegen. Shynynda da aralarynda túsinispeýshilik bolǵany týraly aqparattar kelip jatyr. Menińshe, eń mańyzdysy, quziretti organdardyń jumys barysyna esh yqpal jasamaý kerek. Bul - partııamyzdyń, bıliktiń baqylaýynda turǵan is, — dedi ol Májilistiń jalpy otyrysynan keıin BAQ ókilderiniń saýalyna oraı.

Onyń atap ótýinshe, Rýslan Berdenov narkozda jatqan kezde: «Jumystan qalamyn, jumysqa barýym kerek», - dep aıta bergen. Osy oraıda BAQ ókilderi depýtattan: «Bul - iskerlik pe, álde pıar ma?» - dep suraǵan edi.

— Keshirińiz, narkozda jatyp, pıardy oılaıtyn adam joq. Eshqandaı pıar emes. Senseńiz senińiz, senbeseńiz senbeńiz. Bul jaıt bızneske baılanysty emes. Sebebi, Rýslan myrza 2 jyl buryn depýtattyqqa kelgende bıznesin júrgizýden bas tartqan. Bıznespen aınalysýǵa, bızneske qatysty sheshim qabyldaýǵa quqy joq. Ákimshilikte jumys istegen kezde de sondaı shekteý bar, — dedi Aıdarbek Qojanazarov.

Aıta keteıik, 21 sáýir kúni Shymkentte qala ákiminiń orynbasary Rýslan Berdenovke qastandyq jasalǵan bolatyn. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizilgen. 

Keshe dárigerler Rýslan Berdenovtyń ómirine qaýip tónip turmaǵanyn aıtty. Jasalǵan ota da sátti ótken.