Qojanasyr týraly fılmniń sońǵy kadrlary Almaty men Túrkistanda túsiriledi
ASTANA.KAZINFORM — Qazaqstanda «Molla Nasreddın: Drýg tıajelyh dneı» halyqaralyq tarıhı kórkem fılminiń túsirilim jumystarynyń sońǵy kezeńi bastaldy. Joba túrki áleminiń alty eliniń kınogerlerin biriktirip otyr. Bul týraly Mádenıet jáne aqparat mınıstrligi málim etti.
Buǵan deıin túsirilim toby Ázerbaıjan, Túrkııa, Qyrǵyzstan, Túrikmenstan jáne Ózbekstanda jumys istedi. Fılmniń sońǵy kórinisteri Almaty oblysynda, Almaty jáne Túrkistan qalalarynda, sonyń ishinde Qoja Ahmet ıAsaýı kesenesi mańynda túsiriledi.
Joba 2023 jyly Shýsha qalasynda ótken TÚRKSOI Mádenıet mınıstrleri turaqty keńesiniń 40-otyrysynda bastaý alǵan. «Molla Nasreddın: Drýg tıajelyh dneı» – túrki elderiniń shyǵarmashylyq yntymaqtastyǵy aıasynda júzege asyrylyp jatqan tolyqmetrajdy kórkem fılm.
Týyndy áıgili folklorlyq keıipkerdiń beınesi arqyly túrki halyqtaryna ortaq mádenı qundylyqtardy, dástúrler men dúnıetanymdy tanytady. Fılmde qazaq, ázerbaıjan, túrik, qyrǵyz, túrikmen jáne ózbek tilderi qoldanylady. Fılmniń stsenarıı avtory ári qoıýshy rejısseri – Ázerbaıjannyń halyq ártisi Vagıf Mustafaev.
Basty keıipker Qojanasyrdyń rólin Qazaqstannyń eńbek sińirgen ártisi Saǵyzbaı Qarabalın somdaıdy. Sondaı-aq fılmge Qonysbek Bekaıdarov, Ońdasyn Besikbasov jáne Aqerke Arys túsedi.
Aıta keteıik, bıyl 6 otandyq fılm keń prokatqa jol tartty.
