Qojamjarov memqyzmette komandalyq aýysýdyń qazirgi jaǵdaıy týraly aıtty
ASTANA. QazAqparat - Memlekettik organdardyń birinshi basshylary qyzmetin baǵalaý úshin kadrlar aýyspalyǵy sekildi ındıkatordy qosý kerek. Bul týraly búgin QR Parlamenti Májilisiniń jalpy otyrysynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov aıtty, dep habarlaıdy QazAqparat.
«Búginde konkýrstan tys taǵaıyndaýlar 25 ese sıregenin baıqap otyrmyz. Birinshi basshylardy baǵalaý úshin belgili bir ólshem bar. Osy rette belgilengen shekti buzý kórsetkishi azaıǵany kórinýde. Degenmen, ortalyq organdarda, sondaı-aq jergilikti jerlerde basshylar aýysqan oryndarda kadrlardyń da ketetindigin baıqadyq. Bul turǵyda túrli sebepter kórsetiledi, ıaǵnı óz erkimen jumystan ketý, basqa qyzmetke aýysý jáne basqa da jaǵdaılar tirkeledi. Alaıda, bul máselede tereńde jatqan jasyryn sebepter bar ekenin túsinemiz. Zańnamaǵa sáıkes, bizge tıisti aryz túsken kezde ǵana agenttik osyndaı jaǵdaılarǵa aralasýǵa quqyly. Biraq, aǵymdaǵy jyly bundaı jaǵdaı bolǵan joq»,-dedi Qojamjarov depýtattyń saýalyna jaýap berip turyp.
Onyń sózine qaraǵanda, sondyqtan da memlekettik organdardyń birinshi basshylary qyzmetin baǵalaý týraly kelisimine kadrlar aýyspalyǵy sekildi ındıkatordy qosý máselesi qaralýda.
«Ekinshiden, bizde osyndaı basshylardy jaýapqa tartý boıynsha ákimshilik zańnamany qoldaný turǵysynda ókilettik bar. Jalpy, osy máselemen júıeli túrde aınalysamyz»,-dep túıindedi sózin agenttik basshysy.
