Qojaǵapanov isi: Burynǵy vıtse-mınıstrdiń advokaty qylmystyq isti toqtatýdy surady
ASTANA. KAZINFORM – Elordada burynǵy Mádenıet jáne sport vıtse-mınıstri Erlan Qojaǵapanovqa qatysty qylmystyq is boıynsha sot protsesi jalǵasyp jatyr.
Búgingi otyrysta qylmystyq ister jónindegi aýdanaralyq sotta qorǵaý tarapy 2025 jylǵy 3 sáýirdegi sarapshyny tartý týraly baǵalaýshylar palatasynyń qaýlysyn keri qaıtaryp alýǵa ótinish bildirdi. Advokattar bul qaýlynyń kúshin joıýdy nemese ol jiberilmegen bolsa, múlde jibermeýdi talap etti.
– Mamandy ne úshin tartyp otyr? Biz múlde kelispeımiz, – dedi burynǵy vıtse-mınıstrdi qorǵaý tarapy.
Eske sala keteıik, buǵan deıingi sot otyrysynda Erlan Qojaǵapanov isinde kórsetilgen shyǵyndardy baǵalaý úshin elordalyq baǵalaýshylar palatasynyń mamanyn tartý týraly sheshim qabyldaǵan edi. Sarapshy 2018 jyly forýmdy uıymdastyrý men ótkizýge jumsalǵan taýarlar men qyzmettiń naryqtyq qunyn anyqtaýy tıis bolǵan.
– Men sizden birneshe ret suradym, sot otyrysynda anyqtalǵan derekter qylmystyq isti dereý toqtatý úshin jetkilikti, – deıdi E.Qojaǵapanovtyń advokaty.
Eks-sheneýnikti qorǵaý tarapynyń paıymdaýynsha, qylmystyq is «Bagam-aýdıt» JShS daıyndaǵan qorytyndy negizinde tirkelgen, al ol Qylmystyq-protsestik kodekstiń 181-babynyń 5-bóligine sáıkes maman retinde áreket etýge quqyǵy bolmaǵan. Advokattardyń aıtýynsha, bul jaǵdaı qylmystyq istiń zańsyz qozǵalýyna negiz.
Aıta keteıik, buǵan deıin ótken sot otyrysynda sot eks-sheneýnik ákelgen shyǵyndy esepteý úshin sarapshy tartý týraly sheshim shyǵarǵan edi.
Eske salsaq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady. Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl naýryzdyń sońynda Antıkor atalǵan is boıynsha tergeý amaldary aıaqtalǵanyn habarlady.