Qojaǵapanov isi: sot tergeýi qaıta jalǵasady
ASTANA. KAZINFORM – Búgingi sot otyrysynda burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń bas dırektory Lázzat Kókkózovaǵa qatysty is boıynsha sot tergeýi qaıta jandandy.
Bastapqyda sýdıa tergeýdiń aıaqtalǵanyn jarııalap, sot jaryssózderine kóshýdi josparlaǵan bolatyn. Alaıda prokýror tergeýdi qaıta bastaý týraly ótinish bildirdi. Ol 2018 jyly Qazaqstan men Reseı forýmyn uıymdastyrý kezinde paıdalanylǵan taýarlar men qyzmettiń naryqtyq qunyn baǵalaǵan «Qyzmet baǵalaý» JShS mamany Azat Erjanovtan jaýap alýǵa ruqsat surady.
Buǵan deıin Lázzat Kókkózovanyń advokaty atalǵan baǵalaý esepteriniń durystyǵyna kúmán keltirgen bolatyn. Al Erlan Qojaǵapanovtyń qorǵaýshylary sýdıanyń bul sheshimine qarsy shyǵyp, onyń ókilettigin asyra paıdalanyp, sot isin júrgizý tártibin óz betinshe ózgertkenin aıtty. Eki aıyptalýshynyń da advokattary atalǵan áreket sottyń táýelsizdigin joǵaltady dep málimdedi.
Osylaısha sot baǵalaý mamanyn 5 mamyr kúni jaýap alýǵa shaqyrý týraly sheshim qabyldady.
Búgin burynǵy vıtse-mınıstr Erlan Qojaǵapanovqa qatysty sot tergeýi aıaqtalǵanyn habarlaǵan edik.
Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.
Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl naýryzdyń sońynda Antıkor atalǵan is boıynsha tergeý amaldary aıaqtalǵanyn habarlady. Sondaı-aq sot qorǵaýshy jáne aıyptaýshy taraptyń ótinishin qarastyrǵannan keıin qylmystyq is boıynsha elordalyq baǵalaýshylar palatasynyń mamanyn tartý týraly qaýly shyǵardy.
Kezekti sot barysynda mamandar 2018 jyldaǵy forýmdy uıymdastyrý jáne ótkizý úshin usynylǵan taýarlar men qyzmetterdiń naryqtyq qunyn baǵalaıtyny aıtyldy.
Keıin Erlan Qojaǵapanovtyń isi boıynsha 2018 jylǵy forýmǵa jumsalǵan shyǵyndy tekseretin baǵalaýshy taǵaıyndaldy.
Sondaı-aq sot otyrysynda burynǵy vıtse-mınıstrdiń advokaty qylmystyq isti toqtatýdy suraǵan edi.