Qojaǵapanov isi: prokýratýra eks-vıtse-mınıstrge jazany qatańdatýdy talap etti
ASTANA. KAZINFORM – Elorda soty burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń burynǵy bas dırektory Lázzat Kókkózovanyń ústinen qozǵalǵan qylmystyq iske shyǵarylǵan úkimge túsken shaǵymdy qarap jatyr.
Búgingi sot otyrysynda Qazaqstannyń bıznes-ombýdsmeni Qanat Nurovtyń ustanymy jarııalandy. Qanat Nurov qylmystyq istiń materıalyn zerdelep, qorǵaý tarapynyń ýájin qoldap, sot úkimin joıýdy usyndy. Sondaı-aq Lázzat Kókkózovany aqtaýdy jáne memlekettik organnyń 1 mlrd teńgeden astam somaǵa qoıǵan talabyn jáne memlekettik bajdy óteý týraly talabyn qanaǵattandyrmaýdy usyndy.
Odan keıin sotta prokýrordyń apellıatsııalyq ótinishhattaǵy ýáji boıynsha taraptardyń pikiri tyńdaldy. Aıyptaý tarapy jazany qatańdatýdy talap etip, Erlan Qojaǵapanovqa memlekettik qyzmet ókilettigin asyra paıdalanǵany jáne onyń memleketke keltirgen zalalyn alǵa tartyp bas bostandyǵynan aıyrý merzimin 7 jylǵa deıin ulǵaıtýdy surady.
Eks-vıtse-mınıstr óz kezeginde SUCCESS K agenttiginiń múddesin qorǵaý jónindegi aıyptaý negizsiz ekenin aıtty. Óıtkeni mundaı fýnktsııa onyń ókilettigine kirmegen. Ol aıyptaý tarabynyń kýágerleri (21 kýáger) sotta shyndyqty aıtyp, is júzinde onyń jaǵyna shyqqanyn atap ótti.
Onyń advokattary da aıyptaý ýáji istiń naqty mán-jaıyna sáıkes kelmeıtinin málimdedi.
Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.
Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl mamyrda burynǵy vıtse-mınıstr Erlan Qojaǵapanovǵa qatysty sot úkimi shyqty.
Al tamyzda Erlan Qojaǵapanovty qorǵaýshy tarap sot úkimine shaǵym túsirdi.
Sondaı-aq burynǵy Mádenıet jáne sport vıtse-mınıstri Erlan Qojaǵapanov sottan ózin aqtaýdy surady.
Osylaısha Erlan Qojaǵapanovty qorǵaýshy tarap sot úkimimen áli kúresip jatyr.