Qojaǵapanov isi: qorǵaýshy tarap sot úkimimen áli kúresip jatyr
ASTANA. KAZINFORM – Elorda soty burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń bas dırektory Lázzat Kókkózovanyń ústinen qozǵalǵan qylmystyq is boıynsha apellıatsııalyq shaǵymdy qaraýdy jalǵastyryp jatyr.
Búgingi sot otyrysynda Lázzat Kókkózovanyń apellıatsııalyq shaǵymy jarııa etildi. Ol jerde 2018 jyly onyń kompanııasy forým ótkizýge kommertsııalyq usynys túskeni aıtylǵan. Atalǵan usynysty agenttik júzdegen mekemege taratqan. Tańdaý SUCCESS K kompanııasyna túskenimen, Erlan Qojaǵapanovpen aldyn ala kelisim jasalǵanyn tergeý dáleldeı almaǵan. Sonymen qatar tapsyrys berýshiler de, qatysýshylar da ótkizilgen forýmǵa qatysty eshqandaı shaǵym túsirmegen.
SUCCESS K agenttiginiń bas dırektory Lázzat Kókkózovanyń advokaty Mákish Eskaraevtyń aıtýynsha, aıyptaý qorytyndysynda da, birinshi satydaǵy sot úkiminde de onyń qorǵaýyndaǵy tulǵa men Erlan Qojaǵapanov arasynda sóz baılasý týraly eshteńe kórsetilmegen. Soǵan qaramastan ekeýi de bir protsess aıasynda sottalǵan.
Odan bólek qorǵaýshy tarap tergeý barysynda júrgizilgen aýdıtti dálel retinde qabyldaýǵa bolmaıdy dep esepteıdi. Óıtkeni is negizinen eki qujatqa – «Qyzmet baǵalaý» JShS-niń saraptamasy men «Damý-aýdıt» JShS-niń qorytyndysyna ǵana súıengen. Advokattyń sózinshe, Lázzat Kókkózovanyń kompanııasy atqarǵan jumys pen kórsetken qyzmet tolyq kólemde baǵalanbaǵan.
Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.
Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl mamyrda burynǵy vıtse-mınıstr Erlan Qojaǵapanovǵa qatysty sot úkimi shyqty.
Al tamyzda Erlan Qojaǵapanovtyń úkimine shaǵym túsirildi.
Sondaı-aq burynǵy Mádenıet jáne sport vıtse-mınıstri Erlan Qojaǵapanov sottan ózin aqtaýdy surady.