Qojaǵapanov isi: eks-vıtse-mınıstr aýyryp, sot keıinge qaldy
ASTANA. KAZINFORM – Búgin burynǵy Mádenıet jáne sport vıtse-mınıstri Erlan Qojaǵapanovtyń ústinen qozǵalǵan sottyń kezekti otyrysy ótpeı qaldy.
Sýdıanyń aıtýynsha, 15 sáýir kúni saǵat 6:50-de aıyptalýshynyń jaǵdaıy nasharlaǵan. Aldyn ala dıagnoz boıynsha, oǵan «jedel pankreatıt» dıagnozy qoıylǵan. Eks-sheneýnik Erlan Qojagapanovqa medıtsınalyq kómek kórsetý úshin №1 kópsalaly qalalyq aýrýhanaǵa jetkizilgen.
Búgingi sot otyrysynda qorǵaý tarapynyń kýágerlerin suraý josparlanǵan bolatyn.
Eske salsaq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.
Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl naýryzdyń sońynda Antıkor atalǵan is boıynsha tergeý amaldary aıaqtalǵanyn habarlady. Sondaı-aq sot qorǵaýshy jáne aıyptaýshy taraptyń ótinishin qarastyrǵannan keıin qylmystyq is boıynsha elordalyq baǵalaýshylar palatasynyń mamanyn tartý týraly qaýly shyǵardy. Mamandar 2018 jyldaǵy forýmdy uıymdastyrý jáne ótkizý úshin usynylǵan taýarlar men qyzmetterdiń naryqtyq qunyn baǵalaıdy.
7 sáýirde ótken sot otyrysynda burynǵy vıtse-mınıstrdiń advokaty qylmystyq isti toqtatýdy surady.