Qojaǵapanov isi boıynsha taǵy bir apellıatsııalyq shaǵym tústi
ASTANA. KAZINFORM – Astanada úsh jylǵa sottalǵan burynǵy Mádenıet jáne sport vıtse-mınıstri Erlan Qojaǵapanovtyń isi boıynsha apellıatsııalyq shaǵym qaralyp jatyr.
Búgin sotta Erlan Qojaǵapanovtyń qorǵaýshysy Nurlan Beısekeev sóz aldy. Otyrys basynda atalǵan qylmystyq is boıynsha isti bolǵan ekinshi tulǵa SUCCESS K agenttiginiń bas dırektory Lázzat Kókkózovaǵa qatysty málimdeme jasady.
Aıta keteıik, ol Qylmystyq kodekstiń 190-babynyń 4-bóligi («asa iri kólemdegi alaıaqtyq») boıynsha 5 jylǵa bas bostandyǵynan aıyrylǵan.
Onyń qorǵaýshysy Mákish Esqaraev tyńdalymnyń basynda ótinish bildirip, kásipkerlerdiń quqyǵyn qorǵaý jónindegi ýákil Qanat Nurov qylmystyq istiń materıaldary men úkimdi zerttep shyqqanyn jáne sotta Kókkózovanyń azamattyq jaýapker retindegi ókili retinde sotta sóz alǵysy keletinin jetkizdi.
Advokattyń aıtýynsha, jazasyn ótep jatqan L. Kókkózova apellıatsııada múddesin qorǵaýdy Qanat Nurovqa senip tapsyrýǵa nıetti. Onyń ótinishi eki taraptan da rastaý usynylǵanǵa deıin ashyq qaldyryldy.
Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.
Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.
Bıyl mamyrda burynǵy vıtse-mınıstr Erlan Qojaǵapanovǵa qatysty sot úkimi shyqty.
Al tamyzda Erlan Qojaǵapanovtyń úkimine shaǵym túsirildi.