Qojaǵapanov isi boıynsha 2018 jylǵy forýmǵa jumsalǵan shyǵyndy tekseretin baǵalaýshy taǵaıyndaldy

ASTANA. KAZINFORM – Maman 2018 jylǵy Qazaqstan-Reseı forýmyn uıymdastyrý jáne ótkizýge jumsalǵan taýarlar men qyzmetterdiń naryqtyq qunyn anyqtaýy kerek, dep habarlaıdy Kazinform tilshisi.

Sýdıanyń habarlaýynsha, baǵalaýdy «Qyzmet Baǵalaý» JShS dırektory Azat Erjanov júrgizedi. Ol – astanalyq kásibı baǵalaýshylar palatasynyń múshesi.

Erlan Qojaǵapanovtyń qorǵaýshysy burynǵydaı bul iske baǵalaýshyny tartýǵa qarsy shyqty. 

– Bul sarapshynyń qandaı maqsatpen taǵaıyndalyp jatqany múldem túsiniksiz. Bul jerde maman Erjanovty taǵaıyndaý arqyly qandaı máselelerdi sheshý usynylyp jatqany birneshe ret aıtyldy. Ortasha naryqtyq baǵa týraly suraq. Munda biz «Aktıvterdi baǵalaý ortalyǵy» jaýapkershiligi shekteýli seriktestiginiń qorytyndysyn da, baǵalaý qyzmeti týraly zańnamany da, baǵalaý júrgizý standarttaryn da talqyladyq. Biz ortasha naryqtyq baǵa sııaqty tujyrymdamalyq apparattyń joqtyǵyn anyqtadyq. Osyǵan qaramastan, áli de ortasha naryqtyq baǵa máselesi kóterilip otyr, - dedi qorǵaýshy.

Aıta keteıik, Astananyń qylmystyq ister jónindegi aýdanaralyq sotynda burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń bas dırektory Lázzat Kókkózovaǵa qatysty sot protsesi jalǵasyp jatyr. Burynǵy vıtse-mınıstr laýazymyn asyra paıdalandy degen kúdikke ilindi. Tergeý málimetteri boıynsha, ol kommertsııalyq uıymnyń múddesin kózdep, onymen 2018 jyly Petropavlda Qazaqstan men Reseı arasyndaǵy XV óńiraralyq yntymaqtastyq forýmy aıasynda kórme ótkizý týraly kelisim jasasýǵa lobbı jasaǵan. 

Buǵan deıin sot otyrystary sottalýshynyń densaýlyǵyna baılanysty keıinge shegerilip kelgen. 15 sáýirde Qojaǵapanov medıtsınalyq kómek alý úshin № 1 kópsalaly qalalyq aýrýhanaǵa jetkizildi.