Qojaǵapanov isi: 910 mıllıon teńgeden astam qarajat jalǵan shart arqyly shyǵarylǵan

ASTANA. KAZINFORM — Elorda soty burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń burynǵy bas dırektory Lázzat Kókkózovanyń ústinen qozǵalǵan qylmystyq iske shyǵarylǵan úkimge túsken apellıatsııalyq shaǵymdy qaraýdy jalǵastyryp jatyr. 

Búgingi apellıatsııalyq ınstantsııada prokýror Aktóre Berikov qorytyndy shyǵardy. Buǵan deıin ol eks-vıtse-mınıstrge jazany qatańdatýdy talap etken edi. 

Memlekettik aıyptaýshynyń aıtýynsha, Erlan Qojaǵapanov pen Lázzat Kókkózovaǵa qatysty qylmystyq is ózara uqsas bolǵandyqtan biriktirilgen.

— Qylmystyq ister Qazaqstan men Reseı arasyndaǵy 2018 jylǵy XV óńiraralyq yntymaqtastyq forýmyn daıyndaý men ótkizýge qatysty. Olardy biriktirý taǵylǵan aıyptarǵa baılanysty barlyq mán-jaıdy jan-jaqty ári tolyq baǵalaýǵa múmkindik berdi, — dedi prokýror.

Onyń sózinshe, qorǵaýshy taraptyń ýáji rastalǵan joq. Іs boıynsha qoldanylǵan qujattar zańdy, protseste qatysýshylardyń quqyǵy buzylmaǵan.

— Shartta kózdelgen barlyq qyzmet pen jumys tolyq kólemde oryndaldy, al sarapshylar anyqtaǵan oryndalmaǵan pozıtsııalar is júzinde basqa túrde nemese ózge alańdarda júzege asyryldy degen ýáj teriske shyǵaryldy. Saraptamalyq qorytyndy jabdyqtyń bir bóligi men dybys berilmegenin, jaldaý quny qymbat kórsetilgenin rastady. Qarjylyq qujattar smetanyń birqatar tarmaǵy boıynsha naqty shyǵynnyń bolmaǵanyn kórsetti. Merdiger uıymdardyń qyzmetkerleri arasynan shaqyrylǵan kýágerler barlyq jumystyń oryndalǵanyn rastamady, — dep túsindirdi Aqtóre Berikov.

Sondaı-aq, ol Erlan Qojaǵapanovtyń merdigerdi tańdaýǵa qatysym joq degen málimdemesin kýágerlerdiń aıǵaǵy teriske shyǵarǵanyn aıtty.

— «Qyzmet baǵalaý» JShS saraptamasy jabdyqty jalǵa alý qunynyń 571 mln 707 myń 607 teńgege qymbattatylǵanyn anyqtady. «Aktıvterdi baǵalaý ortalyǵy» JShS baǵasy LED-ekrandardy jalǵa alý qunynyń smetada birneshe ese artyq kórsetilgenin rastady. «Damý» aýdıtorlyq kompanııasy» JShS-niń qarjylyq-aýdıtorlyq qorytyndysy naqty shyǵyn shamamen 1,28 mlrd teńgeni quraǵanyn, al alynǵan qarajat 2,35 mlrd teńge bolǵanyn kórsetti. Aıyrmashylyq affılırlengen qurylym arqyly shyǵarylǵan, — dep tolyqtyrdy prokýror.

Memlekettik aıyptaýshynyń aıtýynsha, qarajattyń bir bóligi — 910 mln 366 myń 999 teńge — affılırlengen kompanııalarmen jasalǵan jalǵan shart arqyly shyǵarylǵan.

Osylaısha prokýror burynshy sheneýniktiń kinási tolyq dáleldengenin aıtyp otyr. Sondaı-aq, ol Erlan Qojaǵapanovtyń múlkine salynǵan aresti azamattyq talapty oryndaý úshin qaldyrýdy surady, biraq Almatydaǵy basqa tulǵaǵa tıesili birqatar jyljymaıtyn múlik tiziminen alyp tastaý qajet ekenin málim etti. Olardyń aıyptalýshyǵa qatysy dáleldenbegen.

— Sottan qorǵaýshy taraptyń apellıatsııalyq shaǵymyn qanaǵattandyrýsyz qaldyrýdy suraımyn. Prokýrordyń apellıatsııalyq ótinishin tolyq kólemde qanaǵattandyrýdy, birinshi ınstantsııa úkimin prokýrordyń ótinishine sáıkes ózgertýdi suraımyn, — dep túıindedi A. Berikov.

Osydan keıin sot alqasy keńesý bólmesine ketti.

Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady. 

Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan. 

Bıyl mamyrda burynǵy vıtse-mınıstr Erlan Qojaǵapanovǵa qatysty sot úkimi shyqty.

Al tamyzda Erlan Qojaǵapanovty qorǵaýshy tarap sot úkimine shaǵym túsirdi. 

Sondaı-aq burynǵy Mádenıet jáne sport vıtse-mınıstri Erlan Qojaǵapanov sottan ózin aqtaýdy surady. 

Osylaısha Erlan Qojaǵapanovty qorǵaýshy tarap sot úkimimen áli kúresip jatyr.