Qojabergen jyraýdyń 350 jyldyǵyn laıyqty atap ótýimiz kerek - A. Tasbolatov
ASTANA. 6 aqpan. QazAqparat - Qojabergen jyraýdyń 350 jyldyǵyn laıyqty atap ótýimiz kerek. Búgin QR Parlamenti Májilisiniń jalpy otyrysynda Úkimet basshysy Serik Ahmetovtiń atyna saýal joldaǵan depýtat Abaı Tasbolatov osylaı málim etti.
Saýal barysynda depýtat Úkimet qaýlysyna sáıkes, aǵymdaǵy jyly 350 jyldyǵy atalyp ótiletin jyraý Qojabergen Tolybaıulynyń mereıtoıyna daıyndyq barysynda áli sheshimin tappaǵan máselelerge toqtaldy. «100 jasaǵan Qojabergen Tolybaıuly ómiriniń 60 jylyn eliniń táýelsizdigi úshin kúresip, at ústinde ótkizgen. Ol qazaqtyń kóp batyrlarynyń biri ǵana emes, biregeıi. 1688-1710 jyldary shırek ǵasyrǵa jýyq qazaq, noǵaı, qaraqalpaq halyqtarynyń birikken jasaǵyna qolbasshylyq jasaǵan sardar, bek, ordabasy, qolbasshy. El taǵdyryn oılaǵan reformator, suńǵyla saıasatker», - deıdi A. Tasbolatov. Sonymen qatar, depýtat Úkimettiń jyraýdyń elimizge sińirgen baǵa jetpes eńbegin atap ótý týraly qaýly qabyldaǵanyn aıta kele, oǵan sáıkes birqatar máselelerge toqtalyp ótti.
«Oblys deńgeıinde jyraýdyń mereıtoıyn atap ótýge qarjy qarastyrylǵanymen, mınıstrlikterge qarjy qarastyrylmaǵan. Soǵan oraı, is-sharalar josparyndaǵy dúnıelerge tolyq qarjy bólinse ıgi», - dedi depýtat.
