Almatyda bıyl kóriktendirý qaǵıdalaryn buzǵandarǵa 110 mln aıyppul salyndy
ALMATY. KAZINFORM – Almatyda qalanyń kóriktendirý qaǵıdalarynyń saqtalýyn baqylaý jumystary júrgizilip jatyr.
Kommýnaldyq ınfraqurylym jáne turǵyn úı ınspektsııasy basqarmasynyń málimetinshe, jyl basynan beri zańdy tulǵalarǵa 8 972 kóriktendirý tólqujaty rásimdelgen.
- Kóriktendirý tólqujaty – menshik ıesi nemese paıdalanýshynyń ózine tıesili nysanǵa irgeles aýmaqty kútip ustaýǵa jaýapty ekenin rastaıtyn qujat, - dep túsindirdi vedomstvo ókilderi.
2026 jyldyń birinshi jarty jyldyǵynda basqarma mamandary 5 myńǵa jýyq aýyzsha eskertý jasap, Ákimshilik quqyq buzýshylyq týraly kodekstiń 505-baby boıynsha 9 679 ákimshilik materıal rásimdegen. Salynǵan aıyppuldardyń jalpy somasy 111,9 mln teńge boldy.
Al kóriktendirý tólqujatyn rásimdeý naýqany qaıta jandanǵannan keıin qosymsha 672 pasport berildi. Osy kezeńde 547 ákimshilik materıal rásimdelip, salynǵan aıyppuldardyń jalpy somasy 12,7 mln teńgeden asty.
Basqarma ókilderiniń aıtýynsha, bul sharalar nysan ıeleriniń jaýapkershiligin arttyryp, qala aýmaǵynda tazalyq pen tártipti saqtaýǵa baǵyttalǵan.
Eske salaıyq, 2024 jyly Almatyda «Taza Qazaqstan» baǵdarlamasy men jańa kóriktendirý erejesi aıasynda qalalyq nysandardy pasporttaý bastaldy.
2025 jyldan bastap Almatyda kásipkerler kóriktendirý tólqujatynyń erejelerin saqtaýǵa mindetteldi.
