Qoja Ahmet ıAsaýı kesenesiniń aınalasynda bıik ǵımarat salýǵa tyıym salyndy - zań
ASTANA. KAZINFORM – Búgin Senattyń jalpy otyrysynda «Túrkistan qalasynyń erekshe mártebesi týraly» zańy men ilespe qujat maquldandy.
Zańnyń maqsaty - Qazaqstan Respýblıkasynyń rýhanı-mádenı jáne tarıhı ortalyǵy retinde Túrkistan qalasynyń erekshe mártebesin aıqyndaıtyn quqyqtyq negizderdi retteý.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, qujatta Túrkistan qalasynyń tarıh jáne mádenıet eskertkishteri men tarıhı-mádenı murasy obektilerin, onyń ishinde Qoja Ahmet ıAsaýı kesenesiniń qorǵaý aımaqtarynda ornalasqan obektilerdi basqarýdyń, saqtaýdyń jáne olardyń bútindigin saqtap turýdyń tıimdi júıesin qurý eskerilgen. Sonymen qatar, Qoja Ahmet ıAsaýı kesenesi men onyń qorǵaý aımaqtarynyń aýmaǵyndaǵy tarıh jáne mádenıet eskertkishterine arheologııalyq jáne ǵylymı-restavratsııalyq jumystardy josparlaý jáne basqarý qarastyrylǵan. Zańda tarıhı-mádenı murany saqtaý, qaıta jańǵyrtý jáne ulttyq qolónerdi damytýǵa, Túrkistan qalasynyń tarıhı-mádenı murasy obektilerin qorǵaý ári paıdalaný jóninde qabyldanǵan sheshimderdi ǵylymı qamtamasyz etýge ekpin qoıylǵan.
Qujat aıasynda Túrkistan qalasynyń jergilikti ókildi organynyń, onyń ishinde dızaın-kodty, qala qurylysy reglamentin, óńirlik nyshandy paıdalaný tártibin bekitý jónindegi quzyreti belgilenedi.
- Budan basqa, zańda tarıh jáne mádenıet eskertkishterin qorǵaýdy qamtamasyz etý jónindegi normalar, sondaı-aq Túrkistan qalasynyń arheologııa jáne ınfraqurylym eskertkishteriniń rezervatyna qatysty normalar aıqyndalady. Atap aıtqanda, qurylys salýdy retteý aımaǵynda qurylys jumystaryn júrgizý kezinde sáýlet kelbeti boıynsha olardyń tarıh jáne mádenıet eskertkishterinen asyp ketýine jol berilmeıdi dep kózdeledi. Qoja Ahmet ıAsaýı kesenesiniń biregeıligin saqtaý jáne onyń aınalasyndaǵy aýmaqqa qurylys salýǵa jol bermeý maqsatynda keseneniń qorǵaý aımaǵynyń shekarasynan bir júz metr qashyqtyqta bıiktigi jeti metrden asatyn jáne aýqymy, túsi jáne qurylys materıaldary boıynsha tarıh jáne mádenıet eskertkishterimen úılespeıtin obektiler salýǵa jol berilmeıdi, - delingen Senat komıtetiniń aqparatynda.
Іlespe zańda Jer kodeksine jáne 4 zańǵa ózgerister men tolyqtyrýlar engizý eskerilgen. Týrızmdi damytý úshin qolaıly jaǵdaılar jasaý maqsatynda múgedektigi bar adamdar men halyqtyń júrip-turýy shekteýli toptaryn (ınklıýzıvti týrızm) qosa alǵanda, barlyq týrıster úshin týrızm ınfraqurylymyna teń qoljetimdilikti qamtamasyz etýdi kózdeıtin túzetýler engiziledi.
Aıta keteıik, Parlament Májilisi atalǵan zańdardy byltyr jeltoqsan aıynda qabyldaǵan.
Budan buryn habarlanǵandaı, Túrkistan oblysy ákiminiń orynbasary Beısenbaı Tájibaev Túrkistan qalasyna zańmen erekshe mártebe berilse, shahar aýmaǵynda jer úı salýdyń talaptary qalaı ózgeretinin aıtty.