Qoja Ahmet ıAsaýı kesenesiniń jaı-kúıin zertteýge 317 mln teńge bólindi
«Qazirgi tańda Qoja Ahmet ıAsaýı kesenesiniń ylǵaldaný jaǵdaıy boıynsha zertteý, zerdeleý jumystary qolǵa alynǵan. 2022 jyly Keseneniń ár bóliginde onyń temperatýralyq-ylǵaldyq rejımin, qabyrǵalaryndaǵy jaryqshaqtardy qadaǵalaıtyn monıtorıngtik júıe ornatyldy. Múddeli mınıstrlikterdiń qaramaǵyndaǵy ǵylymı-zertteý ınstıtýttary Túrkistan qalasynda bolyp, jerasty, jer betindegi (sýǵarý, jasandy kanal) sýlarynyń kesenege yqpalyna aldyn-ala zerdeleý júrgizdi. Sonymen qatar, Keseneni qabyrǵalarynan alynǵan kirpish, stalaktıt, qum qospasynyń fızıkalyq-hımııalyq jáne fızıkalyq-mehanıkalyq qasıetterin anyqtaý boıynsha laboratorııalyq zertteýler jasaldy. Bıyl 28 naýryzda keseneniń jaı-kúıin saqtaýǵa qatysty múddeli memlekettik organdar men ǵylymı ınstıtýttardyń qatysýymen keńes ótkizdim. Nátıjesinde múddeli memlekettik organdarǵa keseneniń jaǵdaıynyń nasharlaýyn anyqtaý boıynsha tıisti ınstıtýttar men mamandardy tarta otyryp, zertteý jumystaryn tezdetý, oǵan irgeles ornalasqan ıAssy baǵyn paıdalanýǵa berý barysynda ǵalymdar men mamandardyń usynymdaryna sáıkes jasyl jelekterdi sýarý normalaryn saqtaý jáne taǵy basqa tapsyrmalar berildi», - dep jazady Altaı Kólginov.
Onyń aıtýynsha, keseneniń jaı-kúıin zertteý jumystaryna bıyl birneshe ǵylymı uıym atsalyspaq.
«2022-2024 jyldarǵa arnalǵan keshendi jospar jasaqtaldy. Osy jospar sheńberinde Keseneniń jaǵdaıyn ártúrli beıimdegi ǵylymı-zertteý ınstıtýttary 2023 jyly zerdeleý jumystaryn júrgizedi. Ǵylymı zertteý jumystaryna Qazaq qurylys jáne sáýlet ǵylymı-zertteý jáne jobalaý ınstıtýty, Ý. Ahmedsafın atyndaǵy Gıdrogeologııa jáne geoekologııa ınstıtýty, Botanıka jáne fıtoıntrodýktsııa ınstıtýty, «Qazqaıtajańartý» mekemesi, ıAsaýı atyndaǵy qazaq-túrik ýnıversıteti, «Áziret Sultan» memlekettik respýblıkalyq tarıhı-mádenı mýzeı-qoryǵy qatysady. Kesene Qazandyqtan 8 dálizben taraıtyn 35 bólmeni quraıtyn bıiktigi 40 metrge jýyq záýlim ǵımarat. Osy oraıda, aýqymdy ǵımarattyń tehnıkalyq jaǵdaıyn súıemeldep otyrý úshin respýblıkalyq bıýdjetten jyl saıyn qarjy qarastyrylyp otyrady. 2023 jylǵa arnalǵan respýblıkalyq bıýdjetten kesenede tolyq ǵylymı-zerdeleý jumystaryn júrgizýge 317 mln teńge qarjy bólindi», - delingen jaýapta.
