Qoja Ahmet ıAsaýı kesenesine ulttyq mádenı-tarıhı eskertkish mártebesin berý usynysyn qoldaımyn – Prezıdent
«Úshinshi másele. Biz mádenı muramyzdy jan-jaqty dáripteýimiz qajet. Elimizdi jańǵyrtý úshin «jumsaq kúshtiń» múmkindikterin tıimdi paıdalanǵan jón. Syrtqy ister mınıstrligi janyndaǵy «KazAID» halyqaralyq damý agenttigi osy jumysqa uıytqy bolýǵa tıis. Kóptegen memlekette mundaı uıymdar ulttyq brendti, tarıhty jáne mádenıetti nasıhattaıdy. Sol arqyly memlekettiń jaǵymdy ımıdjin qalyptastyrýǵa yqpal etedi. Syrtqy saıası bastamalardy júzege asyrýǵa qolaıly jaǵdaı jasaıdy. Kásipkerlerdiń álemdegi bedelin arttyrýǵa kómektesedi. Jańa ǵana Májilis depýtaty Juldyz Súleımenova ulttyq qundylyqtardy dáripteıtin kásipkerlerdi qoldaý qajettigin atap ótti. Bul da – óte oryndy bastama», - dedi Qasym-Jomart Toqaev.
Memleket basshysy shyn máninde qazaqtyń mádenıeti san túrli salany qamtıtyndyǵyn basa aıtty.
«Halqymyzdyń ata-babadan mıras bolǵan mol murasy bar. Ony zaman talabyna saı jańǵyrtyp, jer júzine nasıhattaý kerek. Mysaly, ózimiz irgesinde otyrǵan Qoja Ahmet ıAsaýı kesenesi baı tarıhymyzdyń sımvoly sanalady. Onyń ult rýhanııatyndaǵy orny erekshe ekenin bilesizder. Osy kesenege ulttyq mádenı-tarıhı eskertkish mártebesin berý týraly usynys engizilgen. Men muny qoldaımyn», - dedi Prezıdent.
