Qoja Ahmet ıAsaýı kesenesi jaıly kitap jaryq kórdi

TÚRKІSTAN. QazAqparat - Túrkistanda Qoja Ahmet ıAsaýı kesenesi jaıly ár kezeńde hatqa túsken, el aýzynda aıtylyp júrgen ańyz ápsanalardan jınaqtalǵan «100 ańyz» kitaby jaryq kórdi, habarlaıdy QazAqparat tilshisi.

Jańa kitaptyń tusaýkeseri «Áziret Sultan» memlekettik tarıhı-mádenı qoryq-mýzeıiniń 40 jyldyǵyna oraı uıymdastyrylǵan ǵylymı-praktıkalyq konferentsııasy barysynda ótti.

Atalǵan sharada sondaı-aq,  «Jetpis hıkmet» kitabynyń latyn álipbıindegi nusqasy tanystyryldy. Mádenıet jáne sport mınıstrligi «Áziret Sultan» memlekettik tarıhı-mádenı qoryq-mýzeıiniń mereıtoıyna oraı mýzeı qoryndaǵy qundy jádigerler negizindegi shyǵarylǵan albom-katalogtar «Túrkistan jazırasynyń qysh ydystary» men «Zergerlik buıymdar toptamasy», «Áziret Sultan» qoryq-mýzeıiniń 40 jyldyq damý tarıhyndaǵy muraǵattar qamtylǵan «40 jyldyq albom» atty kitaptardyń jaryq kórýine qolǵabys etti. 
 

Aıta keteıik, «100 ańyz» kitaby derektiligimen, buryn sońdy jarııalanbaǵan tyń málimetterimen qundy sanalady. Jınaq ǵalym-mamandarǵa, oqytýshylarǵa, joǵary oqý ornynyń stýdentteri men jalpy kópshilik qaýymǵa arnalady. Al, «Jetpis hıkmet» kitabynda áýlıelerdiń sultany Qoja Ahmet ıAsaýıdyń sońynda qalǵan telegeı-teńiz murasy qamtylǵan. Sol rýhanı qazynadan alynǵan jetpis hıkmet «Áziret Sultan» qoryq-mýzeıine kelýshiler men jalpy oqyrmandarǵa latyn álipbıinde basylyp otyr.
   

Sondaı-aq, «Túrkistan jazırasynyń qysh ydystary»  aqparattyq ǵylymı tanymdyq albom - katalog retinde jaryq kórip otyr. Onda «Áziret Sultan» memlekettik tarıhı-mádenı qoryq mýzeıi qoryna 40 jyldan astam ýaqyt boıy jınaqtalǵan, Túrkistan aımaǵyndaǵy kóne qalalar men qonystar oryndarynda júrgizilgen arheologııalyq zertteý-qazba jumystary barysynda tabylǵan qysh ydystardyń erekshe úlgileri berilgen. «Zergerlik buıymdar toptamasy» jınaǵy atalǵan  tarıhı-mádenı qoryq-mýzeıi qorynda saqtalǵan zergerlik áshekeı buıymdar toptamasy berilgen.