Qoja Ahmet ıAsaýı kesenesi aýmaǵyn qorshaý jumystary qalaı júrip jatyr
TÚRKІSTAN. KAZINFORM – Bıyl 15 aqpannan bastap Qoja Ahmet ıAsaýı kesenesiniń aýmaǵy qorshalyp, kelýshilerdiń kirýi arnaıy ornatylǵan eki týrnıket arqyly júzege asyryla bastaǵan edi.
Qazirgi tańda kesene mańynda birqatar temir qorshaýlar alynyp, jer qazý jáne brýschatkalardy alý jumystary júrgizilip jatyr. Kazinform tilshisi atalǵan qurylys jumystarynyń mán-jaıyn anyqtap kórdi.
«Áziret Sultan» Ulttyq tarıhı-mádenı mýzeı-qoryǵy dırektorynyń mindetin atqarýshy Nurlan Dúkenbaevtyń aıtýynsha, Qoja Ahmet ıAsaýı kesenesi 2024 jyly Úkimet qaýlysymen memlekettik qorǵaýǵa jatatyn obektiler tizbesine engizilgen. Osyǵan sáıkes, nysannyń qaýipsizdigin ishki ister organdary qamtamasyz etedi jáne strategııalyq nysan retinde qorshaýmen qamtylýy tıis.
– ıAsaýı kesenesiniń qorshaý aýmaǵy 88,7 gektardy qamtıdy. Ázirge kelýshiler kiretin negizgi aımaq 1 shaqyrymǵa jýyq móldir áınekpen qorshalady. Bul jumystardy Túrkistan qalasy ákimdigi qolǵa alǵan. Qalǵan aýmaqty qorshaý máselesi Qazqaıtajańartý mekemesi men qala ákimdigi arasynda kelisilip jatyr. Ortaǵasyrlyq qorǵan úlgisindegi qorshaý salý jospary bar, alaıda bul úshin ıÝNESKO-nyń kelisimi qajet, – dedi ol.
Túrkistan qalasy ákimdiginiń málimetinshe, qazirgi tańda jalpy uzyndyǵy 930 metr, bıiktigi 2,5 metr bolatyn shyny qorshaý ornatý jobasy bekitilip, iske asyrylyp jatyr.
Nurlan Dúkenbaevtyń sózinshe, kesene kirebirisinde qoıylǵan týrnıketter kelýshilerdiń naqty sanyn anyqtaýǵa múmkindik beredi.
– Joba aıaqtalǵan soń kesene aýmaǵyna kirý eki núkte arqyly ǵana júzege asyrylady. Budan bólek tótenshe jaǵdaılar kezinde kólik kiretin arnaıy bir oryn qarastyrylǵan, – dedi ol.
Buǵan deıin birinshi kezeń aıasynda Qazqaıtajańartý mekemesi úsh jyl boıy keseneni saqtaý jáne qorǵaý baǵytynda keshendi ǵylymı-zertteý jumystaryn júrgizgen bolatyn. Osy ýaqyt ishinde nysannyń tehnıkalyq jaǵdaıy jan-jaqty zerdelendi.
– Úsh jyldyq zertteý qorytyndysyna sáıkes, qaıta qalpyna keltirý jumystary bastalady. Ekinshi kezeń osy jazda qolǵa alynady, – dedi spıker.
Aıta keteıik, Qazqaıtajańartý mekemesi buǵan deıin keseneniń qazandyq bóliginde ǵylymı restavratsııa júrgizýge arnalǵan alǵashqy ınjenerlik daıyndyq jumystary bastalǵanyn habarlaǵan bolatyn. Mamandardyń aıtýynsha, bul jumystar shamamen úsh jylǵa sozylýy múmkin.
Budan buryn kesenedegi Taıqazan turǵan qazandyq bólmesi eki jyldan astam ýaqyttan beri jabyq turǵanyn jazǵan edik.
