Kózge kórinbeıtin qaýip: kene arqyly taralatyn aýrý kúsheıip keledi
ASTANA. KAZINFORM — Qazaqstanda Kongo-Qyrym gemorragııalyq qyzbasynyń (KQGQ) taralý qaýpi saqtalyp otyr. Bul — ıksod keneleriniń shaǵýy nemese juqtyrylǵan janýarlardyń qanymen baılanys arqyly beriletin jedel vırýsty aýrý, dep habarlaıdy Sanıtarııalyq-baqylaý komıtetiniń baspasóz qyzmeti.
Aýrý Jambyl, Qyzylorda, Túrkistan oblystarynda jáne Shymkent qalasynda jıi kezdesedi. Kenelerdiń belsendiligi naýryzda bastalyp, mamyr–maýsym aılarynda sharyqtaý shegine jetedi.
Qaýip tobyna mal sharýashylyǵynda jumys isteıtinder, endemııalyq óńir turǵyndary jáne naýqastarmen baılanysta bolatyn medıtsına qyzmetkerleri kiredi.
Inkýbatsııalyq kezeń 2–14 kúndi quraıdy. Aýrý joǵary temperatýramen (39–40 °C), bas aýrýymen, qaltyraýmen, bulshyqet pen býynnyń aýyrsynýymen bastalady. Birneshe kúnnen keıin qan ketý belgileri paıda bolýy múmkin.
Mamandardyń aıtýynsha, der kezinde emdelmegen jaǵdaıda bul aýrý ólimge ákelýi yqtımal.
— Aldyn alý úshin tabıǵatta repellent qoldaný, deneni kenege tekserý, qorǵanysh kıim kııý jáne janýarlardy arnaıy óńdeýden ótkizý usynylady. Kene shaqqan jaǵdaıda óz betinshe áreket etpeı, dereý medıtsınalyq kómekke júginý qajet, — delingen habarlamada.
Osydan buryn Aqmola oblysynda 90-nan astam adamdy kene shaqqanyn jazǵan edik.
