Qozǵaltqyshy sóndirilgen reseılik jolaýshylar ushaǵy Ashhabadqa shuǵyl qondy

ASTANA. KAZINFORM — Dýbaı–Ekaterınbýrg baǵyty boıynsha reıs oryndaǵan «Ýralskıe avıalınıı» áýe kompanııasyna tıesili Airbus A320 jolaýshylar ushaǵy tehnıkalyq sebepke baılanysty Ashhabad áýejaıyna bir qozǵaltqyshy sóndirilgen kúıde qonýǵa májbúr boldy, dep habarlaıdy Anadolý agenttigi.

Tasymaldaýshy kompanııanyń baspasóz qyzmetiniń habarlaýynsha, ushý barysynda áýe kemesiniń komandıri otyn júıesindegi kórsetkishterdiń sáıkessizdigin anyqtaǵan. Qaýipsizdikti qamtamasyz etý maqsatynda ekıpaj nusqaýlyqtarǵa sáıkes áreket etip, qozǵaltqyshtardyń birin óshirip, eń jaqyn áýejaıǵa qoný týraly sheshim qabyldaǵan. Qoný qalypty rejımde ótken.

Áýe kompanııasy qazirgi ýaqytta jolaýshylardy mejeli pýnktke jetkizý úshin rezervtik ushaq daıyndalyp jatqanyn naqtylady. Kútý kezeńinde jolaýshylarǵa qoldanystaǵy federaldyq avıatsııalyq erejelerge sáıkes qyzmetter kórsetiledi.

Óz kezeginde, Oral kólik prokýratýrasy májbúrli qoný dúısenbi kúni, 22 jeltoqsan, saǵat 15:00-den keıin bolǵanyn habarlady. Sondaı-aq qadaǵalaýshy organ áýe kemesiniń tehnıkalyq jaǵdaıyna tekserý júrgizip jatqanyn jáne jolaýshylardyń quqyqtarynyń saqtalýyn baqylaýda ustap otyrǵanyn atap ótti.

Eske sala ketsek, ushaqty muzdan tazartý nege jolaýshylar otyrǵyzylǵannan keıin júrgiziletini týraly jazǵanbyz.

Úndistanda 13 jyl buryn joǵalǵan ushaq tabyldy.