Kózdi demaldyrýdyń 4 amaly
ASTANA. QazAqparat - Kóp kitap oqyp nemese kompıýterdiń aldynda uzaq otyratyn adamdarǵa kózdi ara-tura demaldyryp otyrǵan abzal. Áıtpese birte-birte janaryńyz álsireı berýi múmkin deıdi dárigerler. Kózdi demaldyrýdyń burynnan belgili birneshe amaly bar. Oqyrmandarymyzǵa taǵy bir eske salý úshin massaget.kz portaly bergen myna bir sýretti aqparatty usynamyz.
Birinshi, kóz qarashyǵyn árekettendirý. Joǵary-tómen, ońǵa-solǵa qaraý, munda eń mańyzdysy basty emes, kózdi árekettendirý (sýrettegideı); Ekinshi, kózdi jypylyqtatý. Basty joǵary kóterip kózdi ashyp-jumyp mashyq jasaý. Bul kóz aınalasyndaǵy qan aınalysynyń jaqsy bolýyna septigin tıgizedi. Bul áreketti 2-3 ret qaıtalaý kerek (sýrettegideı);
Úshinshi, ystyq pen sýyqty kezek-kezek ótkizý. Eki oramal daıyndańyz, onyń birin terini kúıdirip ketpeıtindeı ystyq sýǵa shylańyz, endi birin muzdaı sýyq sýǵa salyńyz. Sosyn aldymen ystyq sýǵa salynǵan oramaldy kózge 5 mınýt qoıyńyz, onan soń sýyq sýǵa malynǵan oramaldy kózge 5 mınýt qoıyńyz (erekshe eskertý, ystyq sýdyń temperatýrasy tym joǵary bolyp ketpeýi kerek, kóz terisi názik bolatyndyqtan ystyq oramal kúıdirip ketýi múmkin).
Tórtinshi, alysqa qaraý. Aldymen alys jerlerge 3 mınýt qarap turý kerek, sosyn qoldyń alaqanyna 1-2 mınýt, keıin qaıta alysqa qaraý. Bul áreketti birneshe ret qaıtalap jalǵastyrý kerek.
