«Koza Nostra» ataýymen belgili ıtalıandyq qylmystyq qoǵamdastyq múshesi Qazaqstanda júr - ІІM
ASTANA. Mamyrdyń 19-y. QazAqparat /Aıdar Ospanalıev/ - Áıgili ıtalıandyq qylmystyq qoǵamdastyq «Koza Nostranyń» múshesi Evgenıı Gýreevıch Qazaqstanda júr.
Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń derekterine qaraǵanda, 1977 jyly týylǵan AQSh azamatyn asa iri kólemda aqsha jylystatqany úshin Italııa, AQSh jáne Qyrǵyzstannyń Interpol ulttyq ortalyq bıýrosynyń qyzmetkerleri izdestirýde. «Qolda bar málimetter boıynsha sáýirdiń 15-i kúni ol Qazaqstan aýmaǵyna kirgen, naqtyraq aıtqanda Almatyǵa kelgen. Sondaı-aq ol elimizdegi AQSh elshiliginde bolǵan. E.Gýreevıchte AQSh pen Italııa elderiniń azamattyǵy jónindegi arnaıy qujaty bar. Sonymen qatar atalmysh azamatta Qyrǵyzstan men Reseı memleketteriniń azamaty ekendigin kýálandyratyn qujattar da bolýy múmkin. Sondyqtan qalyń kópshilik E.Gýreevıch týraly qandaı da bir málimetterden habardar bolǵan jaǵdaıda 71-43-49 telefony boıynsha Qazaqstannyń Interpol ulttyq ortalyq bıýrosyna habarlasýlaryn suraımyz», dedi departament bastyǵy.
