Kóz aýrýlary saldarynan 3 myńnan astam balaǵa múgedektik belgilengen
ASTANA. KAZINFORM – Elimizde kózi nashar kóretin 3 myńnan astam balaǵa múgedektik belgilengen, onyń ishinde 300-ge jýyq bala – úsh jasqa tolmaǵan. Bul týraly QR Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim boldy.
– Táýlik boıy jumys isteıtin statsıonarda kózdiń tamyrly qabyǵy aýrýlary dıagnozymen 1 951 bala em qabyldaǵan. Sondaı-aq torqabyq aýrýlarymen – 1 062, kórý júıkesiniń aýrýlarymen – 1 025, qabaq aýrýlarymen – 1 016 jáne qylılyǵy bar 852 balaǵa medıtsınalyq kómek kórsetildi. Al kúndizgi statsıonarda degeneratıvti kóz aýrýlarymen – 1 735, qylılyqpen – 1 056, qabaq aýrýlarymen – 614 jáne torqabyq aýrýlarymen 554 bala emdelgen, – delingen jaýapta.
Mınıstrliktiń málimetinshe, ambýlatorııalyq deńgeıde balalar arasynda eń jıi kezdesetin kóz aýrýlarynyń qataryna mıopııa, qylılyq, katarakta jáne glaýkoma jatady.
– 2026 jylǵy 30 maýsymdaǵy jaǵdaı boıynsha 17 jasqa deıingi 3 myńnan astam balaǵa múgedektik belgilengen. Onyń ishinde 300-ge jýyq bala úsh jasqa tolmaǵan. Al 29 245 bala dınamıkalyq baqylaýda tur. Onyń ishinde 25 193 balada refraktsııa jáne akkomodatsııa buzylystary anyqtalǵan. Al mıopııa dıagnozymen 18 211 bala esepke alynǵan, – delingen habarlamada.
Balalar arasynda múgedektikke negizinen kózdiń týabitti aqaýlary, torqabyqtyń tuqym qýalaıtyn dıstrofııalary, kórý júıkesiniń, kózdiń tamyrly qabyǵy men torqabyǵynyń aýrýlary, sondaı-aq joǵary dárejeli mıopııanyń asqynǵan túrleri sebep bolady.
Aıta keteıik, kelesi jyldan bastap elimizde jańa týǵan náresteniń týabitti kóz aýrýyn erte anyqtaýǵa arnalǵan jańa skrınıng túri engiziledi.
Eske salaıyq, buǵan deıin 2026–2030 jyldarǵa arnalǵan «Qazaqstan balalary» tujyrymdamasyn iske asyrý aıasynda jańa skrınıng túri engiziletinin jazǵanbyz.
