Kóz aýrýy: qalalyq mektepterde mıopııa kórsetkishi 30%-ǵa jetti
ASTANA. KAZINFORM – Qala mektepterinde oqıtyn oqýshylar arasynda eń jıi kezdesetin aýrý túri - mıopııa. Bul týraly QR Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim boldy.
Vedomstvo málimetinshe, Qazaq kóz aýrýlary ǵylymı-zertteý ınstıtýtynyń deregi boıynsha mıopııa mektep oqýshylary arasyndaǵy oftalmologııalyq aýrýlardyń tiziminde birinshi orynda tur. Onyń damýyna tuqym qýalaý áser etkenimen, onyń keń taralýyna kóbine balalardyń ómir salty yqpal etedi.
– Mıopııa – mektep oqýshylary arasynda eń jıi kezdesetin kóz aýrýy túri. Al qalalyq mektepterde onyń taralýy 30%-ǵa jetedi. Onyń týyndaýyna negizgi sebep – jaqyn qashyqtyqta kózge uzaq ýaqyt kúsh túsirý, smartfondar, planshetter jáne basqa da tsıfrlyq qurylǵylardy shamadan tys paıdalaný, sondaı-aq balalardyń taza aýada jetkilikti ýaqyt ótkizbeýi. Álemniń jetekshi mamandarynyń pikirinshe, balalardyń ashyq aýada ótkizetin ýaqytyn kóbeıtý mıopııanyń damýy men údeýiniń aldyn alýdyń eń tıimdi joldarynyń biri, – delingen mınıstrliktiń agenttikke bergen jaýabynda.
Mınıstrliktiń málimetinshe, mıopııa Qazaqstanda ǵana emes, álemde de kózdiń eń keń taralǵan aýrýlarynyń biri sanalady. Dúnıejúzilik densaýlyq saqtaý uıymynyń deregine sáıkes, búginde álem halqynyń 30%-dan astamy mıopııaǵa shaldyqqan.
– Qazaqstanda mıopııanyń údeýin tejeýge baǵyttalǵan zamanaýı ádister, sonyń ishinde perıfokaldy kózildirikter men ortokeratologııalyq lınzalar qoldanylady, - dep málimdedi mınıstrlik.
Ǵalymdardyń boljamynsha, 2050 jylǵa qaraı mıopııa álem halqynyń jartysyna jýyǵynda, ıaǵnı shamamen 5 mlrd adamnan anyqtalady. Onyń ishinde árbir besinshi adamda joǵary dárejeli mıopııa, al shamamen 200 mln adamda patologııalyq mıopııa damýy múmkin.
Eske salaıyq, buǵan deıin kóz aýrýlary saldarynan 3 myńnan astam balaǵa múgedektik belgilengenin jazǵanbyz.
Al onyń aldynda 2026-2030 jyldarǵa arnalǵan «Qazaqstan balalary» tujyrymdamasyn iske asyrý aıasynda jańa skrınıng túri engiziletinin habarlaǵanbyz.
