Kóz aldymyzda tarıhtyń jańa aınalymy bastalyp jatyr – Qasym-Jomart Toqaev

BÝRABAI. KAZINFORM – Álemdegi eski tártip kúırep jatyr, al jańa dáýirdiń sulbasy áli naqty aıqyndalǵan joq. Bul pikirdi Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda aıtty.

− Álemdegi aýqymdy ózgeristerge barshamyz kýá bolyp, tipti, oǵan ózimiz de qatysyp jatyrmyz. Bul úrdistiń jalǵasa bereri sózsiz. Basty halyqaralyq máselelerdi sheshýge qatysty jańa paıymdar men narratıvter, erekshe kózqarastar men tásilder paıda boldy. Buryn-sońdy bolmaǵan qaqtyǵystar, ýshyǵa túsken senim daǵdarysy, qadir-qasıeti kete bastaǵan halyqaralyq quqyq, ekonomıkalyq shaıqastar qazirgi álemniń basty sıpatyna aınaldy, − dep atap ótti Qasym-Jomart Toqaev.

Prezıdenttiń aıtýynsha, munyń bári jańa tehnologııalyq qalyp ornyqqan, mańyzdy resýrstar úshin talas-tartys kúsheıe túsken, óndiris jáne saýda-logıstıka baılanystary qaıta qurylyp jatqan, tehnogendik jáne tabıǵı apattar týyndaǵan kezeńge tuspa-tus kelip otyr.

− Bedeldi saıasatkerler men sarapshylar «dúnıe júzi jappaı berekesizdik jaılaǵan nemese bolashaǵy bulyńǵyr jańa zamannyń qarsańynda tur» degen pikir bildire bastady. Basqasha aıtqanda, álemdegi eski tártip kúırep jatyr, al jańa dáýirdiń sulbasy áli naqty aıqyndalǵan joq. Kóz aldymyzda tarıhtyń jańa aınalymy bastalyp jatyr, − dedi Memleket basshysy.

Buǵan deıin Prezıdent D. Tramp bastaǵan Amerıka ákimshiliginiń dástúrli moraldyq qundylyqtardy qalpyna keltirýge baǵyttalǵan jumystary qoldaýǵa laıyq ekenin aıtqan edi.