Kóz aldymyzda halyqaralyq quqyq álsirep keledi — Prezıdent álemdegi shıelenister týraly

ASTANA. KAZINFORM — Halyqaralyq arenada senim daǵdarysy tereńdeı tústi. Bul týraly Memleket basshysy Qasym-Jomart Toqaev Ulttyq quryltaıdyń V otyrysynda pikir aıtty.

— Biz buryn-sońdy bolmaǵan, túbegeıli jańa qubylystardyń paıda bolǵanyn kórip otyrmyz jáne olarǵa biz jáne kelesi urpaq beıimdelýge májbúrmiz. Basqasha aıtqanda, jaqynda ǵana adam sengisiz nemese múmkin emesteı kóringen nárseler endi qalypty qubylysqa, tipti kúndelikti ómirdiń bir bólshegine aınalyp keledi. Kóz aldymyzda «halyqaralyq quqyq erozııasy» júrip jatyr. Halyqaralyq arenada senim daǵdarysy tereńdeı tústi, — dedi Qasym-Jomart Toqaev Ulttyq quryltaıdyń V otyrysynda.

Prezıdent álemde áskerı shyǵyndar rekordtyq deńgeıge jetip, úsh trıllıon dollarǵa jýyqtaǵanyn, al 2035 jylǵa qaraı bul kórsetkish eki ese ósýi múmkin ekenin atap ótti.

— Kúnnen-kúnge artqan mılıtarızatsııa halyqaralyq qaýymdastyqtyń ádiletti álemdik tártip ornatýǵa baǵyttalǵan kúsh-jigerine nuqsan keltirýde. Osyndaı qıyn jaǵdaıda syrtqy saıasattyń mańyzy arta túsedi. Ol barynsha teńdestirilip, memlekettiń strategııalyq múddelerin qorǵaýǵa jáne ilgeriletýge baǵyttalýy qajet, — dedi Memleket basshysy.

Buǵan deıin Qasym-Jomart Toqaev EAEO aıasynda Qazaqstandaǵy aýyl sharýashylyǵy taýarlary negizsiz qysymǵa ushyraǵanyn, ulttyq múddelerdi qorǵaýda belsendi áreket etý keregin aıtqan edi.