Qoıý sháı, gazdalǵan sýsyn ishpeńiz: Aptap ystyqtan qalaı qorǵanýǵa bolady
NUR-SULTAN. QazAqparat - Elordada aptap ystyq taǵy birneshe kúnge sozylady. Joǵary temperatýra ásirese balalar, qarttar men júrek-tamyr aýrýlary bar adamdar úshin qaýipti. Osyǵan baılanysty astana dárigerleri osy kezeńde turǵyndardy óz densaýlyǵyna muqııat bolýǵa jáne birneshe erejeni saqtaýǵa shaqyrady, dep habarlaıdy QazAqparat qala ákimdiginiń resmı saıtyna silteme jasap.
«Mundaı aýa raıynda tańerteń jumysqa shyǵar aldynda dýsh qabyldaý kerek. Sýy salqyndaý, alaıda qolaıly temperatýrada bolýy qajet. Osylaısha adam aǵzasy birshama salqyndaıdy», — dep keńes beredi №10 qalalyq emhananyń jalpy praktıka dárigeri Nargız Abdýraıymova.
Onyń aıtýynsha, aýa raıyna sáıkes kıiný kerek. Tar nemese tyrysyp turatyn kıimderdi tańdamaǵan abzal. Eń durysy aqshyl tústi, jeńil, keń turatyn jáne aýa ótkizetin matadan tigilgen kıimder kıgen jón.
Sondaı-aq, dárigerdiń usynysy boıynsha serýendeý úshin tańerteńgi 10-ǵa deıingi jáne kúndizgi 17:00-den keıingi qaýipsiz ýaqytty tańdaǵan durys. Kúnniń qatty ysıtyn kezeńi — saǵat 11:00-17:00 aralyǵy. Eger osy kezeńde kóshege shyǵý qajet bolsa, onda joldyń kóleńke jaǵymen júrgen durys. Ashyq jerde eki saǵattan artyq júrgen adamdardyń basynan kún ótýi yqtımal.
«Mundaı kezde adamda júrek aıný, bas aınalý jáne júrek soǵýynyń jıileýi múmkin. Terisiniń túsi bozarsa, bul – jylý soqqysynyń, al qyzarsa – kún ótip ketkenniń belgisi. Eger mundaı belgiler paıda bolsa, kóleńke jerge nemese ǵımarat ishine kirip demalyp, múmkindiginshe kóp sý ishý kerek», — dep túsindirdi dáriger.
Medıtsına mamanynyń aıtýynsha, sýsyn tańdaǵanda qarapaıym sý nemese jemis sýsyny men kompot ishken durys eken. Al shaı ishetin bolsańyz, ony bólme temperatýrasyna deıin salqyndatqan durys.
«Aptap ystyqta tamaqty kóp ishpegen durys. Biraq ash júrmeý kerek, eń durysy ár eki-úsh saǵat saıyn jaqsy tamaqtaný qajet. Tamaq ystyq emes ári jeńil bolýy kerek. Et pen balyqtyń maısyz túri, salqyndatylǵan sorpa, kókónis pen jemis jeýge bolady. Qýyrylǵan taǵamdar men alkogolden aýlaq bolyp, sondaı-aq qoıý shaı, kofe, ásirese gazdalǵan tátti sýsyndardy qoldanbaǵan abzal», — deıdi Nargız Abdýraıymova.
Qorytyndylaı kele dárigerler bólmeni jıi jeldetip, kún qatty ysyǵan kezde terezelerdi qalyń matamen jaýyp qoıýdy keńes etti.
