Qoıshyǵara Salǵarauly álem órkenıeti qazaq jerinen taraǵanyn dáleldedi
«Bul kitaptyń ózegi eshbir adamzat balasy aıtpaǵan, búgingi kúnge deıin eshbir tarıhshy qozǵamaǵan tyń taqyryp. Óıtkeni, resmı tarıh túrki halyqtaryn 6-ǵasyrda paıda bolǵan dese, men adamzat balasy jaratylǵannan bar halyq deımin. Resmı tarıh kóshpelilerdiń barlyǵyn jabaıylar dese, men adamzat órkenıetiniń oshaǵyna alǵashqy ot jaqqan kóshpeliler deımin», - dep atap ótti avtor.
Onyń paıymynsha, kóshpeliler bolmaǵan kúnde de búgingi bizdiń resmı tarıh moıyndap otyrǵan adamzattyń ejelgi órkenıetiniń barlyǵy kóshpeliler men otyryqshy elderdiń, ıaǵnı, kóshpeli mádenıet pen otyryqshy mádenıettiń túıisken jerinen shyqqan.
«Mesopatamııadaǵy shýmerler mádenıetin, Afrıkadaǵy gıpsostar jasaǵan mádenıetti, búkil Eýropa halyqtarynyń mádenıetiniń negizi Rım desek, sol Rım mádenıetiniń negizin qalaǵan etrýskılerdi, keshegi parsy-úndidegi arıılerdi alatyn bolsaq, osylardyń barlyǵy Qazaqstan dalasynan ketken kóshpelilerdiń jasaýymen álemge áıgili órkenıetter bolyp qalyptasqan. Sondyqtan bul kitapta Afrıka men Amerıkanyń, Eýropanyń, Azııanyń, Tıbettiń, Qytaıdyń tipti, osydan 12 myń jyl buryn Atlant muhıtynyń astyna ketken atlanttardyń da, Tynyq muhıtynyń astynda qalǵan 64 mln. halqy bar muǵyrlyqtar da túrki halyqtary dep dáleldeımin», - dedi Salǵarauly.
Qalamgerdiń atap ótýinshe, eńbek ǵylymı jáne tarıhı negizderge súıene otyryp, ıaǵnı, eski hramdardaǵy, ejelgi qysh taqtashalardaǵy sımvoldyq jazýmen beınelengen derekter negizinde dúnıege keldi.