Qoınaýynda qazba baılyqtary bar jerlerdiń ortaq bazasy qurylmaq

ASTANA. QazAqparat – Geologııalyq barlaý nátıjesinde anyqtalǵan qazba baılyǵy bolýy múmkin jer ýchaskeleri týraly aqparattar endi ortaq bazaǵa jınaqtalady. Búgin Ekologııa mınıstrligi men taý-ken salasyndaǵy jetekshi kompanııalary atalǵan júıeni qurýǵa baǵyttalǵan memorandýmǵa qol qoıdy, dep habarlaıdy QazAqparat tilshisi.

«Memleket basshysy Qasym-Jomart Toqaev óz Joldaýynda otandyq geologııa salasyn tolyq tsıfrlandyrý boıynsha naqty tapsyrma berdi. Osy maqsatty mınıstrlik múltiksiz ustanady. Bul oraıda, Ekologııa, geologııa jáne tabıǵı resýrstar mınıstrligi elimizdegi iri ınvestorlar sanalatyn jetekshi kompanııalardyń basshylarymen memorandýmǵa qol qoıdy. Atap aıtqanda, keler jyly bizdiń geologııa qyzmetine «ERG», «Kaztsınk», «Kazaqmys» korporatsııalary tarapynan 10 mlrd teńgeden astam qarjy bólinedi. Geologııa, fızıka salasyndaǵy barlyq aqparatty saraptalyp, tsıfrlaý arqyly «KazNedr» degen platformaǵa engiziledi. Bul – óte aýyr jáne kúrdeli jumys. Qazaqstannyń ár túpkirinde ornalasqan geologııalyq taraptan qundy degen jer ýchaskeleri biregeı ınternet platformasy arqyly álemdegi barlyq ınvestorlarǵa qoljetimdi bolady. Árıne, osy jumys barysynda eń jańa jáne ozyq tehnologııalar qoldanylady», - dep atap ótti Ekologııa, geologııa jáne tabıǵı resýrstar mınıstri Serikqalı Brekeshev.

Onyń aıtýynsha, osynyń nátıjesinde elimizdegi ulttyq geologııalyq baza álemdik deńgeıge shyǵady.

«Jumys mehanızmi jolǵa qoıylǵan. Biz bul bazany jasaımyz. Onyń arqasynda geologııalyq barlaý kezinde alynǵan aqparattar bir bazaǵa jınaqtalady. Sondyqtan, buǵan qyzyǵýshylyq tanytyp otyrmyz. Árıne, ol úshin qajetti jumystardy jedel uıymdastyrýǵa daıynbyz», - dedi «ERG Exploration» JShS bas dırektory Azamat Shalabaev.

Bul joba tolyǵymen ınvestorlardyń qarajaty esebinen júzege asyrylmaq. Onyń aıasynda ortaq bazaǵa toptastyrylǵan jer ýchaskeleri týraly málimetter sheteldik ınvestorlarǵa da ashyq bolady.