Qoımalardy bosatý maqsatynda 3,4 mln. tonna astyq aýystyryldy - AShM
ASTANA. 29 mamyr. QazAqparat - Egin egetin aımaqtardyń qoımalaryn bosatý maqsatynda respýblıka ishinde astyqty aýystyrý sheshimi qabyldanǵan bolatyn.
Osyǵan oraı, 2011 jyldyń qyrkúıek aıynan bastap búginge deıin 3,4 mln. tonna astyq aýystyryldy. Onyń 0,5 mln. tonnasy «Azyq-túlik korporatsııasy» AQ astyǵy. Bul týraly búgin Aýyl sharýashylyǵy mınıstrliginde ótken dástúrli brıfıng barysynda málim boldy.
Mınıstrliktiń jaýapty hatshysy Evgenıı Amannyń aıtýynsha, atalǵan shara jańa egin astyǵyn ýaqytyly qabyldaý daıyndyǵyna alǵyshart jasaıdy. Bunymen qosa, shara astyqty eksporttaý qarqyn alyp turǵan kezeńinde ony tasymaldaýǵa arnalǵan vagondardy tıimdi paıdalanýǵa múmkindik beredi.
«Sonymen qatar, 2011 jyldyń joǵary astyq ónimi otandyq astyqty tasymaldaý jáne saqtaý ınfraqurylymdaryndaǵy birqatar problemalyq máselelerdi anyqtady. Máselen, dándi jáne maıly daqyldar óndirisiniń artýyna baılanysty atalmysh daqyldardyń saqtaý qýattylyqtarynyń jetispeýshiligi paıda bolyp otyr. Bul astyq qabyldaý kásiporyndarynyń materıaldyq tehnıkalyq bazasynyń jańa eginniń astyǵyn ýaqytyly qabyldaýǵa daıyndyǵyn, sondaı-aq jınalǵan ónimniń saqtalýyn qamtamasyz etýde qıyndyqtar týyndatýy múmkin», deıdi E. Aman. Osy maqsattardy tıimdi sheshý úshin aǵymdaǵy jyly bıýdjetten 2,2 mlrd. teńge kóleminde bıýdjettik qarajat bólinýi josparlanyp otyr.
