Qoımalarda 10 jyldan beri jatqan taýarlar bar – Jemqorlyqqa qarsy agenttik keden máselesin kóterdi

NUR-SULTAN. QazAqparat – Sybaılas jemqorlyqqa qarsy kúres agenttiginiń aldyn alý departamentiniń basshysy Anar Jarova elimizdiń keden salasyndaǵy negizgi jemqorlyq táýekelderin atady, dep habarlaıdy QazAqparat tilshisi.

«Osy jyldyń maýsym aıynda agenttik keden salasyndaǵy jemqorlyq táýekelderine taldaý júrgizip kórgen bolatyn. Taldaý barysynda birshama jemqorlyq táýekelderi anyqtaldy. Olardyń ishindegi negizgisi retinde kelesisin atap ótýge bolady: birinshisi – taýarlardy ýaqytsha saqtaý qoımalarynda saqtalǵan taýarlardy joıý baǵytynda keden organdary qyzmetkerleriniń ýaqtyly jumys júrgizbeýi», - dedi Anar Jarova agenttikte ótken jıynda.

Departament basshysynyń aıtýyna qaraǵanda, osy máseleniń keselinen qoıma ıeleri shyǵynǵa ushyrap jatady.

«Osynyń saldarynan qoıma ıeleri ustalǵan taýarlardyń saqtalýyna baılanysty qarjylyq shyǵynǵa ushyraıdy. Ustalǵan taýarlardyń saqtaý merzimine qaramastan (4 aı) taýarlar jyldap qoımalarda jata beredi. Máselen, Aqtóbe oblysynda ustalǵan taýarlar qoımalarda 2005 jyldan beri jatyr. Sol sekildi Almaty oblysynda 2008 jyldan beri jatqan taýarlar bar», - dedi spıker.

Anar Jarovanyń túsindirýinshe, qoımalardyń taýarlardyń saqtalýyna ıeleri jaýapty. Kásipkerdiń shamasy kelmegen jaǵdaıda qoımalarda taýarlar bıýdjet esebinen saqtalady.

«Alaıda is júzinde bıýdjet esebinen taýardy qaıtarý jaǵdaıy tirkelgen emes. Sebebi, keden organdary bul baǵytta qarajat bólinbeıdi», - dedi Anar Jarova.