Qoımada azyq-túlik qory jetkilikti –Atyraýdaǵy sýpermarket basshylary

ATYRAÝ. QazAqparat –Keshe Atyraý qalasyndaǵy iri sýpermarketterde azyq-túlik satyp alýshylar qatary mol boldy. Turǵyndar ásirese, jeke bas gıgıenasyna arnalǵan quraldardy, un, makaron ónimderi men konservilengen et sekildi azyq-túlikterdi kóbirek satyp alǵan, dep habarlaıdy QazAqparat.

Bul sýpermarketterdegi taýar baǵasyna áser etti me? Sýpermarketterde azyq-túlik qory jetkilikti me? Búgin sýpermarketter basshylarynan osy saýaldarǵa jaýap alýǵa tyrysqan edik.

«Keshe bizdi áleýmettik mańyzy bar taýarlardyń tez ári kóbirek satylǵany tańqaldyrdy. Buǵan ne sebep bolǵanyn bilmeımin. Aldyn ala «baǵa ósedi» nemese «taýarlar taýsylyp qalady» degen habarlama bolǵan joq. Bizdiń taýar tasymaldaýshylarmen turaqty baılanysymyz bar. Qoımamyzda da azyq-túlik qory jetkilikti. Osy máselege oraı biz taýar jetkizýshilermen baılanysqa shyqtyq. Alaıda, ónim jetkizýshiler ázirge baǵanyń óspeıtinine sendirdi. Sondyqtan, «qoldan jasalǵan» baıbalamnyń neden paıda bolǵanyn túsinbedik. Bálkim, AQSh dollary baǵamynyń kóterilýi sebep bolǵan shyǵar» -deıdi «Ideal» jáne «Lıder» dúkender jelisiniń kommertsııalyq dırektory Raısa Galochkına.

«Satylym kólemi óskeni ras. Ásirese keshe 10 paıyzǵa kóterilgeni baıqaldy. Biraq, bul dúrbeleńge negiz bola almaıdy. Bizde azyq-túlik ónimderi ǵana satylady. Al, áleýmettik jelilerdegi baıbalamnyń týyndaý sebebin bilmedim» -dedi «Anvar» JShS Atyraý fılıaly dırektorynyń orynbasary Aıtqalı Myrzaǵalıev.

«Bizdiń kóterme saýdamen aınalysatyn dúkenimizde satylym kólemi artty. Al, ózge jelilik dúkenderimizde saýda ádettegideı júrip jatyr. Halyqtyń asyǵys qımyldap, taýardy kóbirek satyp alýynan paıda tabýdy kózdemeımiz. Kerisinshe, jurtshylyqqa baǵanyń óspeıtinin, taýardyń jetkilikti ekenin túsindirip jatyrmyz. Bizdiń baǵanyń qoljetimdi bolýy úshin áleýmettik mańyzy bar taýarlarǵa jasaǵan jeńildikterimiz 24 naýryzǵa deıin jalǵasady. Demek, turǵyndardyń azyq-túlikti kóbirek satyp alýǵa asyqpaǵany jón. Sondyqtan, menińshe, bárin bir sátte alý jón emes. Jalpy, kelilep satylǵan jarma, makaron ónimderi ótimdirek boldy.

Eger taýar tasymaldaýshylar baǵany kóterse ǵana kelisimshartqa saı biz de ósirýimiz múmkin. Onda da 14-30 kúngi aralyq saqtalady. Taýardyń ótimine qaraı qymbattatýǵa jol bermeımiz. Negizinen baǵany turaqty saqtaýǵa tyrysamyz. Sanktsııalanbaǵan ósimdi boldyrmaımyz» -dedi «ıArmarka» saýda úıi» JShS-niń kommertsııalyq dırektory Álııa Býkanova.

«Iá keshe bizde de azyq-túlikti satyp alýshylar qatary kóp boldy. Soǵan qaramastan, bizdiń qoımamyzda taýar qory jetkilikti. Kassalar qalypty rejimde jumys jasaýda. Taýar qory tez taýsylady deýge esh negiz joq» -dedi «Marko» JShS-niń baspasóz hatshysy Symbat Temirjanova.