«Qoıyńdar, óltiresińder dedim»: Sherzat isi boıynsha sotta Talǵar turǵyny kýálik berdi

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr. 

Sotqa «Qamajaı» dúkenine qarama-qarsy ornalasqan kópqabatty úıde turatyn turǵyn Sáken Ákejanov kýáger retinde shaqyryldy. Ol oqıǵa týraly kórgenin baıandady.

— Men uıyqtap jatqanmyn. Eki tars etken dybys estildi. Men motoktsıkl dep oıladym. Sosyn áıeldiń daýsyn estidim. «Skoryı» shaqyryńdar degendeı boldy. Balkonǵa shyqsam, on shaqty jigit júgirip bara jatyr. Bir jigitti tepkiledi. Men «qoıyńdar, óltiresińder ǵoı» dep aıqaıladym, — dedi kýáger Sáken Ákejanov.

Sottalýshylardyń qorǵaýshylary kýágerdiń tergeý kezindegi jaýabyna silteme jasap, sol tusyn naqtylaýdy surady.

«Bir adam kelip otyrdy. Sosyn áıel adam keldi. Sodan keıin bir top adam keldi, onyń qolynan myltyqty tartyp aldy» dep jazǵansyz. Osyndaı jaýap bar dedi advokat.

— Qolynan aldy ma, jerden aldy ma túsinbeı qaldym. Bir zatty aldy da, sol zatpen basynan urdy, — dep naqtylady kýáger.

Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi.

Sonymen qatar oqıǵa ornyna alǵash barǵan polıtseıler kýálik berdi.

Oǵan deıin sot otyrysynda kýáger Elmıra Nurbekova jaýap berdi.

Ekinshi kýáger qyz Dana Jaqsygeldi oqıǵa týraly baıandady.

Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Eske salaıyq, prokýror oqıǵanyń tolyq hronologııasyn baıandady. 

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.