Qoıandy kentinde bir otbasynyń músheleri koronavırýs juqtyrdy
NUR-SULTAN. QazAqparat – Vırýsty juqtyrǵandar Tselınograd aýdanynda tirkeldi. Olar — 1977 jylǵy er adam, 1980 jylǵy áıel adam jáne 2017 jyly týǵan ul bala. Bul týraly QazAqparat Jedel shtabtyń telegram kanalyna silteme jasap habarlaıdy.
Bul azamattardyń barlyǵy bir otbasynyń músheleri jáne Qoıandy kentinde COVID-19 zerthanalyq túrde anyqtalǵan adammen jaqyn baılanysta bolǵan. Buǵan deıin Jańaesil aýylyndaǵy Agrotehnıkalyq kolledj bazasyndaǵy karantındik statsıonarǵa oqshaýlandyrylǵan. Qazir Kókshetaý qalasyndaǵy Aqmola oblystyq týberkýlezge qarsy dıspanserine jatqyzylǵan.
Tselınograd aýdandyq Taýarlar men kórsetiletin qyzmetterdiń sapasy men qaýipsizdigin baqylaý basqarmasynyń mamandary sanıtarlyq-epıdemıologııalyq tergeý jumystaryn júrgizip jatyr.
Bekitilgen is-qımyl algorıtmine sáıkes, vırýstyń odan ári taralýyna jol bermeý maqsatynda epıdemııaǵa qarsy sharalar qolǵa alynǵan.
